終於可以唔使再成日打「#又係日本先有」喇！一路講緊話會喺灣仔碼頭開嘅「築地‧山貴水產市場」，今日開始試業喇！係真‧日本東京築地巿場批發商山治集團直營，毫無懸念，大部分嘅海產都係由日本直送！是咪等得好心急呢？開飯仔去幫大家影咗啲相同拎咗啲料返嚟睇喇！

外帶專區

鯖魚便丼、鰻魚便丼（未定價）

成萬呎嘅水產市場，總共劃分咗3區。外帶專區會有各式嘅刺身、壽司、生熟海鮮同便丼選擇，方便附近OL可以買返office慢慢食又得，一場去到嘅朋友仔亦都可以買返屋企買返屋企孝敬下阿爸阿媽阿姨姑姐……啲便丼係師傅即場新鮮整㗎，據知大約會有6款左右，其中包括鯖魚便丼同鰻魚便丼。

全隻龍蝦包  $168、墨汁海膽包 $68

不得不提嘅係近期大熱嘅龍蝦包，呢度直情有個專屬檔口添呀，特別主打全隻龍蝦包同墨汁海膽包，前者每日都用新鮮蔬菜去整，就連車厘茄都會每日用3、4個鐘頭去風乾，麵包可以揀硬身或者軟身嘅法包；而後者嘅海膽醬係加入咗新鮮嘅海膽㗎，實行由內到外到返內都係海膽！

餐廳區
場內用餐區嚟講，大約就分咗4區，每區都係獨立運作，如果想食晒咁多款美食，睇嚟你就要預返多少少時間喺各區度奔走一下喇。

1. 即捕浜燒海鮮區

呢區有21個位，場內有新鮮游緊水嘅海鮮，例如大大隻嘅鱈場蟹、龍蝦等等，即揀即捉即燒！幸運兒揀啱靚位坐，就可以睇住師傅即場燒嘢食喇！開飯仔有幸望住師傅燒，睇住啲肉汁係咁泌出嚟，係即刻就會有肚餓嘅感覺！而燒好嘅龍蝦同鱈場蟹肉已經開咗邊、剝咗殼，方便食之餘亦都非常爽口彈牙，鮮味十足！

2. 海鮮丼飯區

海膽丼 $268、特上山貴丼 $238

喺隔籬嘅呢區就有36個位，碗碗丼飯都好鬼足料！海膽迷就梗係揀海膽丼，幾板海膽咁多，一定餵得飽部相機先！啲海膽好鮮甜下。而咩都想食啲嘅朋友仔就可以揀特上山貴丼，原隻蟹鉗、龍蝦肉、海膽，仲有10幾款角切魚生！想成碗食又得，自製手卷食都得，有紫菜畀埋你㗎喇。

3. 海鮮生蠔吧區

暫時會有3款法國生蠔出售，分別係Victoria 1842、Special Lady同皇室堡小公主，3款生蠔大細雖然有唔同，但海水味同樣都比較重。

4. 立吞壽司區

壽司盛合  $88，5件

海鮮拼盤  $368

零售區

零售區入面可以買到日本高人氣同新潮嘅零食，另外仲有大大個嘅日本生果，香印青提呀，蘋果呀哈蜜瓜呀之類好鬼吸睛，遲啲有埋酒牌之後就連清酒都有得買。

特別時段仲可以近距離欣賞原條鮪魚解體show，睇完即切即食堅係爽皮！

呢個水產巿場開朝10晚10，凌晨就業內人士批發海鮮嘅時間，等大家第二朝又有新鮮嘅海鮮食，正呀喂！以後唔使下下飛日本嚕，過多幾轉海就得！

詳情：
築地‧山貴水產市場
地址：灣仔碼頭2樓
營業時間：10am – 10pm
預約網址：http://yamataka.optitable.com/tc/