Item: 丹桂軒(新都店)
Rating: 4
Author: 奧志雷

奧志雷

等級3

2016-06-16

餐前小食，雪菜撈毛豆，咸咸酸酸，白雲鳳爪，微辣微酸，兩碟都好開胃。梅子蒸排骨，除左略肥了一點外，味道合格香甜，骨少肉多啖啖肉。

帶子魚翅灌湯餃，必食 ﹗雞上湯好鮮甜、足料，完全唔覺有半點味精，魚翅爽口、帶子同乾瑤柱均鮮味非常，灌湯餃皮薄餡靚，讚。

現時香港一般酒樓餃皮又厚又粉，蒸到過晒火連皮都熔咁滯。皮厚麵粉多當蒸過龍既時候餃皮溶溶地，搞到成個湯都只係麵粉味。而且餡料唔係肉碎就肥豬肉，一係勁加香菜、芫茜、青蔥、韮黃、馬蹄呀，令食客覺得多料，有取巧之厭。

水晶鮮蝦餃，外皮晶瑩通透，原隻鮮蝦爽滑彈牙，鮮蝦濃郁而醃味得宜，配埋少許筍肉及極少量肥豬肉，使其更香口好味 ﹗

葡汁鮮竹卷，非常特別又得意，有別於普通濃濃蠔汁，有創意又好味。一般做法都係蠔皇鮮竹卷，味道較濃及多油又易膩。依家轉用葡汁，感覺好清新，淡淡椰香味道，忌廉幼滑包住腐皮，整條塞入口，腐皮香口濕潤索盡葡汁，好好味。

淮山海參雞札，又係新派菜，香港未食過，所以點都一試。鮮淮山粗身又夠粉，上等貨式，但淮山本身係無咩味。海參軟滑，彈彈震騰騰，本身亦無咩味道。用竽絲代替腐竹，我都係覺得腐竹較好味，整體黎講偏清啖既菜色，完全單靠雞柳味道，還可以。

炸石岐乳鴿，味道中規中矩︳最緊要無過咸。肉質幼滑帶肉汁，略厭鴿皮並無炸脆，而且又唔夠熱，可能油溫唔夠滾啦，幸好無油膩感啫。

鮮蝦燒賣，原隻蝦仁真材實料，結實不散，醃味甜美，好好好味 ﹗唔似得香港一般酒樓一味貪平，偷工減料，勁落肥豬肉、蝦碎得幾粒，肥到死，哼 ﹗

堂煮川芎白芷魚頭湯，招牌菜必食 ﹗藥材足料，特濃鮮魚湯底，巨形魚頭啖啖肉滑滑溜溜，鮮味出眾。份量都不少，足夠 4 碗湯呢。如果覺得唔夠濃，可以要求再落少水一點，越濃越好飲。農場蔬菜最新鮮，魚湯灼生菜，鮮嫩爽甜，無得頂。