中央飯店

营业中

休息中

今朝要去深水埗名店买口罩，未免晏咗人太多，所以一早就出门，点知嚟到又太早，咁不如再翻兜我心念念既中央饭店。上个礼拜无食到脸咁大既大包，今次一样食唔到，阿姐话啱啱卖嗮。咁好啦，好彩仲有虾肠，今次食返无上次咁惊喜，感觉粉皮无上次咁滑，上星期既虾味道比较鲜，但今次既虾肠都系上等既。另外又点咗鱼肚烧卖，第一次食，鱼肚索嗮啲汁，食落爽甜，烧卖本身弹牙有咬口，里面除猪肉外，应该仲有虾肉，味道唔错。最后食咗碟鸭脚扎，里面既芋头入口松化，肉就系鱼肚烧卖既肉，拆开腐皮，里面既鸭脚包住酱汁，都几得意，酱汁系腐皮里面，唔系外面，呢个系我见过第三个版本既鸭脚扎，都算几特别，鸭脚质感比较raw，入味但唔系焖到淋，有咬口，甚至脚筋都系脆既。特别一提，呢间酒楼推车阿姐好好记性，我问佢有咩点心，佢真系好努力咁背嗮十三款点心出嚟，我无办法唔比赞，试想象，你如果一日要推十几转，每转都十几款唔同配搭，你点记。阿姐中途仲要话唔好意思，多谢嗮之类，其实系我唔好意思就真，因为阿姐话想食咩同佢讲就得，唔使问有咩系车度。时隔一星期，再次帮衬感觉都系咁好，食物质素中等，服务不错，价钱贴地，有机会一定要再嚟。