影片
電話號碼
83008127
開飯介紹
裝潢大氣雅致的海鮮酒家，設有多個廂座，環境寬尚舒服；提供任食火鍋、活海鮮料理等，是火鍋控的聚腳點。
繼續閱讀
營業時間
今日營業
07:00 - 16:00
17:30 - 23:00
星期一至日
07:00 - 16:00
17:30 - 23:00
*到店外賣供應時間: 21:00
以上資料只供參考, 請與餐廳確認詳情
有關獎賞計劃
💁♀️💁♂️ 29/12/2023(Fri), Dinner🍽大埔間稻香早前裝修咗一輪，呢幾日重開之後改咗名叫壹號漁船，都係稻香集團旗下嘅食肆，新餐廳特別在於喺餐廳嘅後段有一個位置間開咗專門安排食自助火鍋🍲，有晒凍櫃、飲品櫃同食物擺放嘅位置，呢個安排係未裝修之前係無嘅。今晚本身我哋打算係去另一間餐廳食飯，但路過呢度時被新開張所推出嘅自助火鍋🍲同新張優惠吸引咗，最後都係臨時改喺呢度食晚飯。新張期內仲要晚上8點半後入座有82折，就更加提高咗性價比↗️。好在而家新張唔係太多人知，否則第時應該會好受歡迎要等位。裝修完後餐廳比之前光猛咗，坐得都好閖落，餐枱都幾大張，即使放完兩個大大嘅冰鎮海鮮盤，都仲有位置可以放到其他食物。而今晚我地order咗：🔆 120分鐘晚市自助火鍋🍲（SRF黑和牛肩胛）（$298/成人；$168/130cm以下小童）點解講呢個自助火鍋🍲性價比好高呢？首先，一坐低每位先送一碟蠔皇鮑魚扣百花菇🍄，鮑魚都唔隻，配合爽滑而又煮到入味嘅百花菇🍄，伴住蠔皇汁，味道都唔錯。呢個係新張優惠，遲啲嚟食可能就無得送啦。跟住會跟人數上一大盤冰鎮嘅海鮮，分別每位有：- 波士頓龍蝦🦞【半隻】- 骨膠原魚肚【1件】- 海斑件【2件】- 海蝦🦐【2隻】- 鮮鮑魚【1隻】- 小紅魷🦑【2隻】- 鮮味生蠔【1隻】- 鮮爽蝦丸【1粒】我哋計三位大人、一位小朋友（因為哥哥已經過咗130cm🙈），就分咗兩大盤送上。每盤嘅海鮮都排列得整整齊齊，新鮮生猛。特別係啲海蝦，上枱時仲識郁嘅！龍蝦🦞都好大隻，煮熟後肉質鮮甜，個龍蝦鉗都好大隻好好肉，千祈唔好錯過！魚肚煮過之後吸收晒湯嘅味道，又腍滑又好食。海斑件厚肉嫩滑，每件都連埋魚皮，入口充滿骨膠原嘅感覺。海蝦🦐唔算好大隻，但隻隻新鮮，肉質結實彈牙。鮮鮑魚洗得乾淨，煮完食落爽口。小紅魷🦑就正正常常，食得出都係新鮮唔會梅。生蠔大大隻，煮完都無縮水，入口邊位爽口而蠔肉夠厚身，咬落有蠔汁爆發出嚟，唯一係蠔味唔算太濃。蝦丸爽口大粒，都幾足料。食完呢盤海鮮都飽咗一半，跟住開始食肉類🥩。我哋選擇嘅B餐係可以無限添加SRF黑和牛肩胛，A先生一向都好喜愛SRF出品嘅牛肉，覺得佢有肉味之餘，亦有返咁上下靚嘅油花同油脂香，喺美國🇺🇸牛肉同日本🇯🇵和牛之前嘅一個唔錯嘅平衡。今次嘅肩胛肉都無令A先生失望，入口嫩滑有肉味，油花分佈得幾靚，但又唔會食到成口油。之前再追加咗黑豚肉同一啲韓國🇰🇷蜆，味道都唔錯，韓國🇰🇷蜆食落都厚肉而有海水味。自助區有一般大路嘅丸類、蔬菜🥬、菇🍄等等可以自取，比較特號係有手臂💪🏻咁長嘅蟹柳，小朋友就最喜愛☺️。另外，響鈴、魚皮、生根有個暖櫃去暖住，就咁即食都可以。其他汽水🥤、啤酒🍻、茶類都係大路嘅選擇，食完仲有個雪櫃仔提無雀巢雪糕🍦做甜品，叫做好過無咁啦🙈🤣。湯底方面都有唔少選擇，而且都唔係一般普通嘅湯底，例如有我哋今晚選嘅龍蝦🦞湯、花膠雞湯雙併，另外仲有椰子🥥雞湯、胡椒豬肚湯、花雕雞湯、酸菜魚湯⋯⋯等等。我哋嘅龍蝦🦞湯底味道都幾濃郁，用嚟淥海鮮都好配合到；而花膠雞湯唔算十分濃，但清清哋煮肉類蔬菜都唔錯👍🏻。🔆🔆🔆🔆🔆🔆🔆🔆🔆🔆🔆🔆🔆❤🙆♂️(A先生)整體食評：8.5/🔟❤🙆♀️(為食妙妙)整體食評：9/🔟👉🏻 食材新鮮，海鮮盤賣相、質素都好高，整個自助火鍋🍲相當抵食A先生車友指數 🚗🛣️ 交通容易指數：🚗🚗🚗🚗(4/5)🅿️ 泊車容易指數：🚗🚗🚗🚗(4/5) 👉🏻 餐廳附近就有唔少錶位🅿️，等一等好快有得泊👉🏻 太和站或者大埔中心行過嚟都係10分鐘左右路程，交通尚算方便🔆🔆🔆🔆🔆🔆🔆🔆🔆🔆🔆🔆🔆餐廳🍽: 壹號漁船 (富萊花園) 地址🌐: 大埔翠樂街8號富萊花園地舖及1樓A號舖電話☎️: 8300 8127✍📸Text ＆ Photos by 為食妙妙&A先生🔆🔆🔆🔆🔆🔆🔆🔆🔆🔆🔆🔆🔆
繼續閱讀
母親節當日同媽咪去食晚飯，5個人叫左個半席母親節套餐$14xx(未計加一)，有10款食物、1支啤酒、4罐汽水 。柯打後20分鐘內已極速上左5度菜，同佢地講左食吾切慢慢嚟，但廚房一於少理，其餘5度都係迅速送出😆，啲野好快凍哂 。但其實餐廳吾爆，入座8成左右 ，可能廚房唔夠人掛🤷🏼♀️出餐次序同食物評價：1. 乳豬拼盤 - 乳豬一般，切雞、黑木耳、麻醬粉皮正常，叉燒好乾似柴皮2. 炸鮮奶 - 正常3. 澳洲龍蝦伊麵 - 龍蝦都新鮮嘅，味道正常，但伊麵就好難食，好「林」無味 。4. 蒸沙巴 - 腥，但養魚腥係正常，所以預左 。5. 螺片西蘭花 - 螺片好硬同整到好辣，怪怪地，西蘭花正常 。6. 炸子雞 - 七八成熟有血水，叫亞姐攞番入去整熟啲，佢話隻隻都係咁架喎，想放低就走😓，我哋堅決吾收貨，佢先肯攞走，最後碟雞10分鐘內出返嚟相信係用微波爐叮熟，冇咩雞味啲皮又唔脆 。7. 翅（唔記得係咩翅） - 魚翅近乎無，我嗰碗搵到兩條幼過粉絲，咁都算，但根本一啲味都冇唔知食緊乜 。8. 鮑魚花菇生菜 - 正常9. 荷葉飯 - 濕爹爹10. 壽桃包 - 最好味最正常😂我哋食淨好多嘢，好嘥，但真係好難食😭#咁嘅價錢#咁嘅食物質素#咁嘅服務#Dying
繼續閱讀
第一次朋友介紹去食小菜，見D評論麻麻地，朋友又話好好食，真係一心諗住Try 下，朋友真係冇介紹錯，我叫左海鮮餐12人份量，真係冇諗過又平又好食😋直得推介由第一道菜開始到最尾都冇失望，海鮮又新鮮又好味，第一道菜出龍蝦🦞又新鮮又彈牙真係正到暈，魚又新鮮又滑捋捋又肥美，炸雞皮脆內軟又好味，鮑魚有新鮮，蜆肉菜有甜，個炸生蠔先不得了又大隻又好食，就嚟又到母親節都會帶家人去吃飯⋯正推介推介⋯正正正正正正正正
繼續閱讀
食物質素已經唔係重要 ‼️因當你上到去知道落唔到嚟已經所有胃口都無晒‼️4月20號晚帶同老人家去試呢間火鍋店，果晚傾盤大雨諗住都無所謂室內，我家老人家要用輪椅代步，但呢間已開多年前身是 稻香 都知有扶手電梯可以上，當落時可轉扶手電梯方向，因有兩層樓高度，當上到去等待入位時見一老人家要離開 當時要求店舖職員轉電梯方向，職員稱電梯已經不能轉方向，本舖亦沒有其他貨𨋢使用，只可以用樓梯行下去！！！樓下大堂完全沒有任何指示「電梯只供上 不提供落」，由於當晚大雨已上到去只好草草食完再由4-5人扶我家老人家落樓，所以發此文希望行動不方便就不要到此家！
繼續閱讀
未入去之前啲阿姐已經唔想做生意咁，唔理人，問咗幾次仲有幾多張檯先答你，明明入面有大量位置都唔畀你入…第一，餐具極其污糟，有幾個碗仲有菜係度…第二，餐牌編排不妥當，好難睇。寫好單後，等咗2分鐘一個樓面都未見到，最後要親自拎去接待處先可以落單。第三，食物好難食，乳鴿超咸，咸到苦，$288嘅龍蝦伊麵又細份，唔好食。價錢就見仁見智啦，但呢個價錢嚟講食啲咁嘅嘢絕對唔抵。唔建議食呢間壹號漁船，隔離明星咁cheap都好過佢。
繼續閱讀