京旬 (已結業)

Item: 京旬
Rating: 4
Author: 奧志雷

Kyo Shun

17 食評

味道

環境

服務

衛生

抵食

206

尖沙咀

$201-400

日本菜燒烤壽司/刺身

奧志雷

等級4

難得約到女鏢神係抽空跟我共進晚餐，當然要搵好野食、搵間靚餐廳啦！網左搵右搵，搵到京旬唔錯喎，有靚景、有刺生壽司、有串燒鐵板燒，正！仲發現有我一直好想試既燒原條喜之次呢，過千蚊條只有手掌咁大，非常好奇點解咁貴，有幾好食呢？人家一心黎食碳燒原條日本海魚架麻，點知除左叫套餐外，就只得千二蚊以上既貴價魚先有得原條燒囉，好失望！今次放過您，下次先試啦！八點幾好肚餓，快快點幾個菜先！
Suntory draft 日本生啤，無原條燒魚食嬲嬲地，酒杯日本生啤降降火先。從來咩見過或飲過日本啤，我淨係識朝日同麒麟囉。依隻啤酒味濃，苦中帶甘甜，還可以。
5 色刺生併盤，賣相好靚喎，咁貴但每款得兩片，太可怕喇。坐係壽司吧望實師傅做菜，一目了然。見到刺生種魚類唔係太多乍喎，約得 6 款左右。非常特別既 5 色刺生併盤，居然選取 4 款都係魚。油甘魚，係我其中最愛既一款魚類，棉滑富彈性，魚油豐富又非常甘香甜美，如果係腩就更好啦。
吞拿魚，一向對吞拿魚紅肉無咩好感，因為大多淡而無味又鞋烚烚，最嚴重試過有雪味添。但今次經驗令我完全改觀，原來紅肉都可以有鮮味，鮮味中仲滲出少少魚甜味喎，質感未算滑但可接受，滿意。火炙鯛魚，炙過既鯛魚份外油潤、魚味份外濃郁，因為部份油脂被溶化，而且蒸發左小量水份，令味道更香更濃縮。鯛魚結實彈彈的質感非常有趙口，甜美香口，回味無窮。深海池魚，普通池魚就食得多，深海池魚又係點呢？肉質比起普通既更嚥韌更滑溜噃，𣎴過魚味都係偏清淡，配上青葵豉油帶出鮮味，心滿意足。
帶子刺生，質感居然同車蠔一模一樣，您鄉下邊度架？超級爽口結實，一般食開都係軟棉棉而滑滑的。帶淡淡海水味，帶子特濃而甜味強烈，都唔錯，但有少少食唔慣如此質感及味道。
茶壼海鮮湯，仍然有少少陰影，不過係香港食點都比係大陸食信心大好多。話說層經係深圳萬象城某間日本餐廳食放題，order 左個海鮮茶壺湯。熱辣辣上枱喇，試一啖即想吐，滾水浸蝦殼味！仲帶少少嗅 up 味！大開一睇，嗅霉蝦一隻、灰黑色金菇一紮、蟹柳碎幾粒，驚嚇程度爆燈！真係大鄉里呢 ﹗咁多個兜到底點用架？唯有問問侍應姐姐，原來係倒係隻碟度飲既，材料都係倒出黎係碟度食，湯亦可以用杯飲，鮮檸檬就隨食客喜好加唔加都得。如來如此，謝謝。
倒係隻淺碟度飲好鬼得意呢，好似日本古時飲酒咁款。熱辣辣試個原味先，都係普通日本醬油湯底啦，不過帶點海鮮甜味，湯汁清香不濁既，好味。再滴幾滴鮮檸汁，好醒神噃，增添左幾分清爽既氣味與味道，Good ﹗等我徹底地搜一搜身，摷清楚先。有冬菇有蟹柳有金菇有豆腐，海鮮味甜美加上日式醬油清香，不錯不錯！豆腐好滑啊，仲要切到星形好搞笑。菇味濃，質地幼滑充滿水份，一咬湯汁衝出黎咁款。鮮蝦、蟹柳滿意啦。
火焰清酒煮蜆，每次叫依類餸我都有點猶豫，因為好多餐廳都烚到蜆過晒龍，又韌又無味，衰過食香口膠囉。賣相有點功架喎，紅紅烈火好 warm 呢，唔好燒親我啲手毛噃。視覺效果一流，唔知質數又如何呢？火焰清酒煮蜆，您好野 ﹗火侯剛剛好，湯汁滾熱辣而蜆肉依然居然保持肥美鮮甜，仲要帶少少酒香，推介！高質無投訴。
碳燒煙肉蘆筍卷，居然連碳爐一齊上，虧您諗得到，收我咁貴都應該啦 ﹗好有氣勢，燒得吱吱喳喳送到，碳香味兇湧而來，擋都擋唔住 ﹗雖然師傅已經係廚房燒好左先攞出黎，但我都想燒多一陣，等煙肉再乾身啲、讓蘆筍再吸引多啲油脂。我唔客氣喇 ﹗香口到不得了！煙肉燒得乾爽嚥韌，非常濃厚煙燻香氣，略撒上香草調味，令味道添上少少清新。蘆筍勁爽勁脆，多汁又甜美，跟煙肉凝成強烈對比，但又非常合得黎喎，美味！1234、5678 極速消滅，食晒 ﹗好好味呀 ﹗既簡單又美味 ﹗
碳燒鵝肝釀雞翼，釀到肥嘟嘟又完整，似乎好好食咁喎。習慣都係燒多陣先食，等佢再熱一點、再香一點 ﹗Ready ﹗一啖咬晒整隻雞中翼，將口塞得滿滿，感覺超爽 ﹗雞翼內外溫度一致，熱辣辣，鵝肝非常油潤黏口，充滿鵝肝油香。雞翼皮香肉嫩，不過雞肉無咩味道，完全無醃過呢，只靠雞皮外的少少調味，即時扣晒分。都係餃子釀雞翼最好味，味道最夾，但雞翼同免治豬都係要醃一醃比較好！
碳燒和牛粒，同樣用碳爐盛著出場，微微碳火燒得和牛油脂溶化，在燈光下不斷閃爍，好鬼癢眼 ﹗燒牛肉既香味鑽入您既鼻孔，直逹大腦，躲不過，即時口水流 ﹗一口三件一次過，滑溜溜入口即溶，油脂豐富澎湃，像噴泉又像瀑布。外層燒得極香口帶碳燒香，裡面粉紅嫩滑 juicy ！而且難得牛味濃郁，以前食開既和牛都偏淡，得個滑字，油得很，麻麻地，依個完全唔同。碳燒和牛粒，5 色壽司併盤，居然一齊上枱，但我選擇食和牛先囉，好明顯潛意式裡頭我係極喜歡食牛既。
5色壽司併盤，壽司飯掂喎！見師傅哥哥咁後生，估唔到飯粒煮得咁靚，而且手握壽司力度剛好，乾爽得黎唔會散，質感飽滿嚥韌！赤貝，當然不能跟活亦貝相提並論，雖然味道偏淡，但不失爽脆肉質。吞拿魚，真係好難得紅肉都好帶魚甜味，滿意。油甘魚，滴滴油脂甘香滑溜，餘香留在齒隙間久久不散，好好食。雕魚，結實得黎又不失軟棉，鮮味鮮而清爽。火炙比目魚，炙完既魚肉更緊緻，魚味更濃。5 款都非常有水準，全部肥美香甜，加上鮮山葵蓉豉油，無得彈！越食越開胃。
甜蜜晚餐享受完畢，美味之旅又過一段落，今晚跟女標神談笑風生真係十分愉快，食得非常開心。