FUMI (已搬遷)

新年限定宫崎和牛賞味套餐之宮崎和牛肩鐵板燒，幾鐘意宮崎和牛，紅肉同脂肪比例剛好，油味係響度但又唔會話肥到冇哂牛味咁，而且自己動手燒DIY好玩得嚟仲可以自己控制生熟度，個人鐘意食得比較生，最好輕輕燒熟上下表面內裏生生地就最正，隨肉更附有好多調味配料俾你搭住食，令味道變化更大，另外仲有埋杯白飯俾你做和牛丼添，正！

前菜係宮崎和牛洋蔥沙律，和牛薄切兼燒至內生外熟，夾埋生洋蔥絲同沙律醋汁食夠開胃，仲有一粒粒迷你疑似花椒刺激味蕾好得意

刺身拼盤有赤貝/油甘魚/深海池魚/甜蝦，赤貝夠爽嫩，油甘魚油香濃郁，深海池魚雖然有油甘個油份咁高，但都帶有油香而且仲偏爽口，至於甜蝦就夠哂鮮甜

鯛魚濃湯真係濃湯唔係得個講字，一開蓋陣魚味已經湧出嚟，飲落亦感覺到成條魚嘅濃縮精華煲哂出嚟；宮崎和牛壽喜燒小鍋，最愛壽喜燒甜甜嘅味道，牛肉都索盡湯汁令牛味中都帶甜，仲有啲疑似蒟蒻芋絲腍得嚟又彈牙，好食！