大角咀出現小京都？原來係男團MIRROR成員AK同哥哥再度開店，走和風裝修，更搵嚟前四季酒店餅廚主理，主打日式甜品！招牌係以日本京都經典為主題嘅特色蛋糕同菓子，而貓咪造型刨冰、抹茶甜品及特飲亦不容錯過。
榻榻米地台+和服造型貓咪
雪月花佔地約1500呎，裝修好有日本風情，一大打卡點當然係裡面嘅日式榻榻米地台，而AK七隻愛貓亦換上和服造型，俘虜各位貓奴同「生粉」（AK粉絲暱稱）嘅心啊。餐廳更特別將其中一張枱換為可調節高度嘅枱，方便使用輪椅嘅傷健人士！
京都景點主題手工甜點
渡月（檸檬柚子抹茶慕斯杏仁蛋糕）（$90，每日限量30份）
三款招牌甜品以京都名勝為靈感，例如呢份渡月就參考咗遊客必訪嘅「渡月橋」。杏仁蛋糕上面清新嘅檸檬柚子醬同茶香清幽嘅抹茶慕斯相間，整體味道清爽唔膩。亮點之一在於碟邊透明嘅清酒啫喱，可以增加味道層次！而貓爪造型嘅蛋白餅亦呼應「明月」上面嘅貓耳，可愛又精緻。
嵐山（焙茶心太軟伴柚子味薄脆）（$90，每日限量30份）
另一知名景點「嵐山」就化身為焙茶口味嘅心太軟，即叫即焗外脆內軟，加上緩緩流心同甜度得宜嘅茶香，就咁食已經令人印象深刻。可以配搭貓爪造型嘅雲呢拿雪糕同帶微微柚子清香嘅薄脆，凍熱口感衝擊更有層次。
清水（紅莓醬麻糬和菓子伴梅酒味乳沬）（$110，每日限量30份）
京都「清水寺」係賞櫻名地之一，因此以清水寺為靈感嘅清水就係櫻花造型嘅和菓子，粉紅色嘅花瓣係用白芸豆沙製作嘅櫻花味和菓子，裡面就係紅莓醬麻糬。加上外面淺藍色嘅梅酒味乳沬，口感柔和、酸甜有致。
AK愛貓造型蛋糕+刨冰
NEKO芝麻刨冰（$108）
「生粉」都知道AK愛貓，估唔到甜品亦出現唔少貓咪！例如以AK愛貓芝麻為靈感設計嘅呢份NEKO芝麻刨冰，選用日本溫泉水製冰令刨冰口感更綿密、入口即溶。外面係黑芝麻醬，加上刨冰裡面嘅豆腐味雪糕、日本蕨餅及自家製朱古力芝麻脆脆，口感多變、芝麻香濃郁而且甜度啱啱好。
抹茶貓貓卷蛋（$78）、原味貓貓卷蛋（$68）、焙茶貓貓卷蛋（$78）（卷蛋任選3件$205）
可愛貓貓亦變成約6cm嘅厚切卷蛋，差唔多係普通Cafe嘅兩倍厚！鬆軟蛋糕包住忌廉同麻糬，可以食到三重口感。原味最能夠食到忌廉嘅奶香，而抹茶同焙茶就茶香比較突出，最加分係三款卷蛋都甜而不膩。
芝麻貓貓抹茶蛋糕（$350，6”，需3天前預訂）
同樣以AK愛貓芝麻為藍本，師傅更設計出立體芝麻蛋糕！外面係黑芝麻味慕斯，裡面就係抹茶蛋糕。6吋大無論係生日Party定一大班朋友開心Share都好啱，不過見到芝麻咁可愛真係有啲唔捨得切囉。
更多【新店直擊】： |
冬日暖意茶香甜點
十勝紅豆抹茶年糕湯（$68）
冬天如果唔想食太多凍嘅刨冰或者蛋糕，呢度亦有暖嘅和風甜點。年糕參照日式製法烤至外焦內煙韌，食落更有淡淡米嘅甜香。倒入手沏抹茶再加上十勝紅豆，紅豆嘅甜味襯托出抹茶嘅甘甜，暖心又好味。
自選茶品配菓子四品（$158）
以六格木盒奉上嘅係自選茶品配菓子四品，顧名思義係可以自選茶飲，拍攝呢款奶香烏龍帶淡淡奶味，非常順口。再配搭四款經典和菓子：迷你抹茶脆脆芭菲、抹茶雪糕配十勝紅豆、菓子、蕨餅。
福岡羽衣抹茶製作特飲
（左）Matcha Dirty（$45），（右）芒果抹茶鮮奶（$70）
餐廳特別選用福崗八女市嘅羽衣抹茶，比其他抹茶味道更為清新易入口。因此就算唔係抹茶控，都會鍾意呢杯芒果抹茶鮮奶，鮮芒果茸加上日本牛乳同抹茶奶蓋、層次鮮明，芒果嘅香甜同抹茶都幾夾。
而Matcha Dirty係Dirty Coffee嘅變奏，將熱濃縮咖啡變成抹茶奶蓋，而抹茶可選清香嘅福岡八女羽衣抹茶，或者香濃嘅京都宇治抹茶，下面同樣係凍牛乳。飲嘅時候建議唔好搞勻，而要一啖飲到熱抹茶奶蓋同凍牛乳嘅口感撞擊。奶蓋相當細緻濃厚，抹茶回甘明顯。
糰子冷泡龍珠茉莉奶蓋（$75）
清香嘅龍珠茉莉茶加上岩鹽奶蓋同日式糰子，同樣記得唔好搞勻，一啖飲齊奶蓋同龍珠茉莉茶先能夠品嘗到兩種味道同層次。日式糰子唔單止好啱打卡，口感亦煙煙韌韌幾過癮。
雪月花
地址：大角咀利得街11號利奧坊商場地下G507號舖
文：Cathy.H
相：Yan Yan、餐廳提供
片：Yan Yan
