又有「台風」吹襲香港啦，仲已經喺維港附近登陸咗喇！各位追風迷留意！今次終於唔係珍珠奶茶，而係精品火鍋！年頭宣佈會嚟香港開設第一間海外分店嘅台灣火鍋店寬巷子，日前喺海港城開始試業啦。

有別於一般嘅火鍋店或麻辣火鍋店，除咗肥牛同海鮮之外，佢哋主打嘅係一系列手工精緻，賣相靚爆嘅自家手工製火鍋菜式，樣樣都呃like-able！當中最得女生歡心嘅，肯定係一朵朵玫瑰咁樣嘅玫瑰松板！呢道新鮮豬頸肉，每塊厚度都有講究，要師傅一片片咁切完再砌，刀功、手工、手溫、速度等缺一不可。至於點食，都有技巧：落鍋前先喺面層淋上蛋白漿，然成朵花放落去，令到每片肉都更加嫩滑。如果你係放喺麻辣湯度就更加惹味，陣陣麻香喺口中爆發。

一條條好似雪條咁嘅枝仔冰，係老闆戴生嘅童年回憶嚟。就好似大家細個要考得好先獲獎食一枝雪條一樣，有種珍貴又會心微笑嘅感覺。呢條偽雪條，係用新鮮墨魚打成花枝漿，再混埋豬頸肉、蝦肉，沾上菠菜粒同台灣椪柑條，用水晶麵皮包住餡料而成。淥完後依然唔會散開，外層煙韌感覺幾得意。

呢幾粒菠菠糖，單憑見到粒粒芝麻都分佈得咁平均，就知道好考功夫啦。師傅先喺白豆皮上搽上芝麻醬同白芝麻，再用菠菜捲實佢。一食就充斥住芝麻嘅香氣，同時滲有豆香，值得一試。

好多人去台灣都會買牛軋糖同鳳梨酥返嚟做手信，咦？乜打邊爐都得嘅咩？原來又係師傅嘅手作啊！前者以墨魚汁、花枝漿、木魚絲等製作，夠晒彈牙，仲要加埋雞軟骨入去，增加口感之餘，仲扮到真係好似牛軋糖嘅堅果咁；至於後者，外層係豆腐、花枝漿同蝦漿所製，內餡係自家慢火煮新鮮鳯梨而成嘅鳳梨漿，鮮甜嫩滑，而且呢道鳳梨酥仲係香港獨有，台灣都冇㗎。

仲有，唔好以為呢盤「花」係裝飾品嚟，望真啲！係一棵棵菜嚟呀！佢哋特登跟過法國花藝師團隊去學插花技術㗎，連啲菜都砌到咁靚，會唔會OP咗少少？

最後講下個鍋先，辣椒仔女梗係要食麻辣鍋啦，之但係如果同枱有啲唔食得辣嘅朋友仔呢？鴛鴦鍋啦。一紅一白，紅嘅麻辣鍋係用新鮮花椒、豆瓣、辣椒等十幾種香料炒香，加中藥材調製而成，以麻引辣，食到咁上下就會feel到開始嚟料，條脷同喉嚨都會麻麻地，但又好舒服咁。同埋唔使怕會愈食愈鹹呀，個鍋嘅設計將啲辛辣香料放喺中間個圈圈度，啲辣味會慢慢滲入湯底，令到無論打咗幾耐都可以保持原味。至於白湯，就係豬骨濃湯底嚟，仲有紅棗、蓮子、百合等滋潤食材。

 玫瑰水果茶

寬巷子
地址：尖沙咀海港城海運大廈地下OT G57舖

文、相：Kar