一年（唔）容易又中秋，今年中秋係10月1號，而家先7月尾，但已經開始有唔少月餅進攻巿場。正所謂「早買早享受，遲買多幾嚿」，想食嘅，就梗係趁早鳥優惠買啦！另外，亦有部分接受預購嘅人氣月餅，數量有限啊！
早鳥優惠
當文歷餅店 手工伯爵茶奶黃月餅
今年年頭登陸嘅紐約人氣餅店，平時每款甜品都靚到出晒名，品牌首次推出中秋產品，當然都係行靚樣路線啦。大廚小兔月餅禮盒又靚又cute，玉兔戴住頂幾有揸手嘅廚師帽，仲有個背囊仔孭住。禮盒內有4件本地製造嘅手工伯爵茶奶黃月餅，餅皮鬆化，茶味濃郁，仲滲有陣陣奶黃香。品牌考慮到大家最近成日都因為疫情而要留喺屋企，於是就喺背囊內放入小兔柚子曲奇烘焙套裝，跟住張食譜卡，用包柚子曲奇預拌粉加牛油、雞蛋，簡單幾步，就可以喺屋企整到兔仔牛油曲奇啦。
早鳥優惠（按此）：即日起至8月23日
A-1 Bakery 迪士尼Tsum Tsum 款奶黃月餅禮盒
各位Tsum Tsum粉絲見到實好鍾意~ 呢間連鎖餅店嘅月餅，由包裝盒到月餅到禮物都係Tsum Tsum啊！一盒4款唔同造型嘅月餅，都係奶黃味，米奇、布魯托、唐老鴨同鋼牙咁cute係會有啲唔捨得食。買一盒月餅仲會附送Tsum Tsum限定款式手挽袋添~
早鳥優惠： 即日起至8月31日
心事如塵茶食亭 月餅連塵茶
人氣插畫Dusty Kid今年唔止開多咗好多分店，仲推出月餅套裝。一盒四件包括黑麥朱古力蓮蓉月、高知抹茶紅豆月，另外仲有兩款由台灣引入嘅塵茶王、塵茶后茶包。月餅係100%香港製作、香港烘焙，而且不含防腐。食啖餅再飲啖茶，更可中和膩感。
早鳥優惠（按此）：即日起至8月17日，送塵不織布袋一個
Valérie 清新伯爵茶月餅
忠粉最鍾意佢哋嘅流心奶黃月同流心宇治抹茶月餅，今年當然繼續都有啦，而且仲有新成員添！三款全新口味包括伯爵茶、蛋黃黑芝麻同陳皮紅豆蛋黃月餅，齊齊放晒入湖畔小兔珍藏版禮盒。伯爵茶味啖啖沉實茶香，難得有月餅入口感覺清新！蛋黃黑芝麻相當足料，以上品黑芝麻砌粒磨粉，味道夠晒濃郁。而陳皮紅豆蛋黃則口感豐富，仲可以先後感受到甘、香、甜、醇等多重滋味。
早鳥優惠（按此）：即日起至9月6日，約9折
望月 香港電車限量版
以酥皮奶黃月餅聞名嘅望月，今年新推出「流心雜錦月餅」同「香港電車限量版」。前者一盒有齊流心奶黃月同流心抹茶月，後者則有8個流心奶皇月，流心蛋黃係自家研製嘅，甘香濃郁，個盒仲要係香港電車鐵罐，月餅上亦印有電車圖樣，電車迷實鍾意。另外，值得讚賞嘅係佢哋轉用更易被大自然分解嘅100%甘蔗纖維製造嘅月餅杯，比以往嘅透明膠杯更環保！
早鳥優惠（按此）：即日起至8月31日，低至8折
逸東軒 竹製蒸籠包裝
兩款星級迷你月餅：迷你奶黃月同迷你蛋黃白蓮蓉月，既有蛋香，口感又幼滑，而且細細個食完冇咁膩。最特別係今年嘅包裝，好似平時酒樓嘅點心籠咁，採用中式嘅竹製蒸籠。過咗中秋，都可以循環再用嚟變成餐盤或裝飾。
早鳥優惠（按此）：即日起至7月31日，65折；8月1-31日，75折
香宮 迷你抹茶紅豆柚子白玉月餅
由米芝蓮星級中菜廳中菜行政總廚出馬創作嘅月餅，無論係傳統定新潮嘅口味，都帶有驚喜。傳統方面，師傅加入雲南玫瑰糖製作，仲特別訂製月餅木模，做出玫瑰型嘅迷你玫瑰糖白蓮蓉蛋黃月餅，味道清甜，而且每個禮盒仲配一個LED中秋燈籠添，限量供應100盒咋；另一款新口味，則係迷你抹茶紅豆柚子白玉月餅，外層香脆，抹茶味濃香，內餡酸甜有致又有咬口，稍稍加熱先食仲會有流心效果添。
早鳥優惠（按此）：即日起至8月19日，8折（不包括玫瑰糖白蓮蓉蛋黃月）
狸小路「皇上不上朝」 台式流心奶皇月餅
雖然而家仲未飛得過台灣住，但好彩都有機會食到台灣知名烘焙餅店嘅出品！由阿里巿集引入嘅呢款台式流心奶皇月餅，以台灣原材料製造，同香港平時我哋食開嘅都有明顯嘅分別，例如餅皮冇咁鬆化，反而係輕薄香軟，帶有淡淡奶香，奶黃餡仲加咗椰漿添。而流沙有鹹蛋黃碎又有吉士粉，口感香滑。唔使叮都有流心效果，夠晒方便。
早鳥優惠（按此）：即日起至8月28 日，約75折
紹香園 X Biggerfit 燕窩柚子月餅
老字號紹香園聯乘網上購物平台BiggerFit推出矜貴嘅燕窩柚子月餅，粒粒韓國柚子酸酸甜甜，淡淡清香有助中和月餅嘅油膩感，再加埋養顏嘅燕窩，同埋採用低卡路里嘅稀少糖、益生元製作，呢款月餅，減緊肥嘅朋友仔都啱食。用藍金色嘅夜景月餅禮盒都好靚，盒面係夜光設計，打開盒後就見到立體剪影嘅夜景，仲有埋小電燈配置，夠晒華麗。
早鳥優惠（按此）：即日起至7月31日，7折
明閣 栗子豆沙月餅
旺角呢間酒店嘅月餅，由米芝蓮星級粵菜嘅師傅製作，一盒迷你錦鏽月餅內，除咗有金桔奶黃月餅、傳統蛋黃白蓮蓉月餅外，仲有今年新口味，栗子豆沙月餅。
早鳥優惠（按此）：即日起至7月31日，約65折
唐人館 迷你匠心奶黃月餅
主打傳統精緻中菜嘅唐人館，推出嘅月餅都特別精緻。一個係鵝黃與琥珀橙盒子，一個係嫣紅色與湖水藍設計，同樣印上鳥語圖案，滿滿復古嘅味道。內裡分別裝有4個經典雙黃白蓮蓉月餅同8個迷你匠心奶黃月餅，兩者同樣香甜軟滑。
早鳥優惠（按此） ：即日起至8月31 日，約7折
得到米芝蓮一星嘅添好運點心專門店主理人麥桂培師傅首次製作月餅，同本地嘅野生食用菌品牌合作推出兩款加入新意嘅傳統月餅。玫瑰雲腿合桃月餅靈感嚟自五仁月餅，選用有油香而嘅雲南宣威火腿，配以合桃同玫瑰花，食落帶花香。崧子奶皇月餅就喺香滑奶黃餡當中混入香脆崧子粒，增加口感。現貨己在門市有售、售完即止。
早鳥優惠 ：即日起至8月17日78折；8月18日至9月25日85折
預購
四喜麵包西餅 花生醬奶黃月
呢間主打港式麵包嘅小店，每年嘅月餅包裝都以傳統為主題，又整到靚一靚咁。今年都唔例外，幾款全新包裝封面包括有《四喜兵團》、《堅有讀書》等嘅迷你奶黃月餅、《食花生未》迷你花生醬奶黃月餅之類，玩味精警。想要傳統鐵盒裝都有，《鐵面包拯》裝住嘅係雙黃紅豆沙月餅，佢哋嘅月餅一向都餅皮鬆化，甜度適中，水準保持得唔錯。
預購網址（按此）
膳心小館 傳統月餅
食月餅仲可以做善事？呢間良心社企，一直默默為區內嘅長者服務，佢哋今年推出三款傳統口味嘅月餅，分別係雙黃白蓮蓉月、雙黃黃蓮蓉月同埋五仁月餅，佢哋鼓勵大家預購咗之後，除咗可以用嚟自用或者送禮，仲可以考慮透過長者機構，捐畀清貧嘅長者，令佢哋喺中秋時節都可以感受到大家嘅暖意。
預購網址（按此）：8月8日截單，數量有限，售完即止
微熱山丘 鳳梨奶黃月餅
大家係唔係好掛住台灣嘅味道呢！台灣品牌——微熱山丘嘅「鳳梨奶黃月餅」！月餅餡除咗有奶黃之外，仲加入咗酸酸甜甜嘅土產鳳梨，鹹香中夾雜著甜味，有層次。買月餅仲送限量版布袋添~
預購網址（7-11:按此、HK TVmall:按此）：即日至8月25日
荔園﹒流金歲月 飛行棋流心奶黃月餅禮盒 
荔園係好多人嘅童年回憶，今年禮盒設計以Q 版嫦娥同太空人為主題，再附送太空主題飛行棋添，好有兒時嘅味道。6個獨立包裝嘅流心奶黃月餅甜而不膩，輕切仲會即刻流心，蛋香十足。
Café 103 迷你奶黃月餅
呢間酒店嘅月餅禮盒，由薩凡納藝術設計大學嘅學生設計，感覺典雅，既有藝術氣息，亦有節日氣氛，用嚟送禮啱晒。迷你奶黃月餅奶香味重，但又唔會太甜，剛好。
恆香老餅家 三黃白蓮蓉月餅
想食正宗傳統口味月餅，一定會諗起恆香老餅家。選用被譽爲「中國第一蓮子」嘅頂級湘潭貢蓮，湘蓮粒大飽滿係古代朝廷貢品，並由40多年經驗嘅恆香老師傅手工古法銅鑊炒煮成蓮蓉，加上三重份量嘅恆香秘製鹹蛋黃，每一啖都係細滑蓮蓉同油香化沙蛋黃。
愛護動物協會 SPCA x LYCHEE & Friends 慈善月餅
愛協喺今個中秋聯乘韓國LYCHEE & FRIENDS 陪大家人月兩團圓，可愛LYCHEE 荔枝熊喺「搞怪實驗室」研發出充滿趣味嘅限量版慈善月餅，月餅罐分別印上4位超萌主角，包括LYCHEE、COCO、JOBI、OPPA嘅為食造型，並特別喺月餅印上愛協標誌同LYCHEE嘅「嘜頭」。
餐飲券：9折 SPCA x LYCHEE & Friends 慈善月餅 (4罐禮盒裝)
更多【2020中秋合集】： |
文：Kar
