呢個夏天有唔少「台」風襲港，最新嘅係總店喺台中，主打切面呈蜂巢狀可頌（Croissant）嘅八月堂！喺台灣非常受歡迎，最高紀錄每日賣出超過一萬個！香港首店會供應11款常設口味，加1款期間限定口味，每日現場烘烤，即睇開飯仔直擊介紹啦。
 

八月堂香港首店選址太古AEON STYLE，半開放式設計可以見到可頌新鮮出爐。為咗令大家喺香港都食到同台灣店一樣嘅味道，可頌麵團會從台灣運到香港，所以能夠堅持品牌嚴選世界優質食材嘅精神：選用歐洲頂級牛油、日本百年品牌麵粉，同ISO認證雞蛋。
 

麵團嚟到太古店後需要放喺溫室發酵，再每日現場烘烤，當中都有嚴格標準控制品質，例如發酵嘅時間、溫度同濕度都要控制好，可頌焗好先會有完美蜂巢組織。發酵後麵團同出爐後嘅可頌都有體積標準，太大或太細都會影響口感所以唔會販賣。出爐嘅時候牛油香仲非常誘人！
 

香港店特別口味

沖繩黑糖（$22）

太古店會售賣11款唔同口味嘅可頌，必試嘅一定係呢款太古店限定嘅沖繩黑糖！即係話全港得呢間店有得買咋，酥脆可頌上面係日本農協JA認證嘅頂級沖繩黑糖醬。
 

食落黑糖天然甜香濃郁，同外酥脆內鬆軟嘅可頌又幾夾。食到中間有核桃粒同橘子醬增加口感同味道層次，令人覺得食完一個都唔會太膩。
 

相思卡士達（$22）

香港店第一個期間限定口味！同台灣店一樣，香港店都會不定時推出期間限定口味，保持新鮮感。
 

相思代表紅豆，而卡士達即係香港人叫開嘅吉士，吉士嘅香滑加上紅豆嘅甜香同樣討喜。
 

三大皇牌口味

紅粉戀人（$18）

喺台灣有三款口味特別受歡迎，創出單月賣出超過18,000個嘅記錄！當中包括最受女生歡迎嘅紅粉戀人，可頌加上士多啤梨朱古力脆皮同粒粒士多啤梨果乾，聞起嚟就有士多啤梨嘅甜香。食落士多啤梨嘅微酸同白朱古力嘅甜味平衡有致，加上粉紅色賣相亦相當搶鏡。
 

皇家爵士（$18）

朱古力系列另一推介，黑朱古力帶少少苦味，加上杏仁粒嘅香脆，配牛油香濃郁嘅可頌非常夾。甜度比紅粉戀人低，所以廣受大眾歡迎。
 

蜂巢可頌（$15）

蜂巢係形容可頌切開後，裡面組織一格格好似蜂巢咁，咁亦代表可頌食落會有非常鬆軟細緻嘅口感。原味可頌更能夠品嘗到牛油天然香味，亦自己配搭唔同果醬享用。
 

 
常設口味逐一介紹

炙燒明太子（$19）

鹹食口味，唔單止可頌表面，裡面亦有抹上鹹香有致嘅明太子醬。同可頌嘅牛油香相輔相成。
 

香濃起司（$19）

同樣係鹹食口味，今次係澳洲車打芝士片舖喺可頌上面，半溶芝士唔單止增加芝士濃香，亦增加口感層次。
 

曜黑胡麻（$22）

黑色可頌係因為麵團加入咗竹炭粉同黑芝麻，切開裡面係香滑黑芝麻醬！食落充滿芝麻香。
 

迷戀卡士達（$20）

可頌裡面係吉士醬，咬落會有少少爆漿效果！吉士唔會死甜，而係帶少少雞蛋同牛奶嘅乳脂香，口感順滑。
 

雪花檸檬（$17）

可頌上面嘅白色雪花其實係用新鮮檸檬汁特調嘅糖霜，食落檸檬味道突出，酸味令可頌變得清新同Refreshing。
 

朱古力可頌（$18）

同皇家爵士唔同嘅係，呢款朱古力可頌係將朱古力揉入麵團當中，所以每啖都有同樣香甜嘅朱古力味，朱古力控必試。
 

白色莊園（$17）

牛油可頌加上白朱古力脆皮，甜度較高。
 

最後有兩點提提大家，第一係太古店新開有特別優惠：即日起至9月21號，每日首30名顧客都可以免費得到一盒6件可頌嘅禮盒！如果攞唔到免費禮盒，亦可以用優惠價$98購買6款可頌。
 

第二點係可頌最好即買即食，以上介紹過嘅四款可頌：沖繩黑糖、相思卡士達、曜黑胡麻，同迷戀卡士達因為有內餡嘅關係，建議兩小時內享用。其他口味亦建議購買當日享用喔。
 

八月堂
太古康山道1-2號康怡廣場南座AEON STYLE地下G11號舖

文、相、片：Cathy