有人飲酒為盡興、有人飲酒為消愁，究竟係咩原因驅使你去飲酒？中環作為一眾酒鬼嘅蒲點，選擇當然多，最近仲新開咗間台北過江龍嘅雞尾酒酒吧，特別在於全部cocktails都係on tap，一嗌就有得飲。

門口行過望到入面有24個tap頭，仲以為又一間啤酒舖，殊不知呢24個tap斟出嚟嘅都係雞尾酒。

Cocktails畀人嘅印象通常都係「外貌協會」，顏色裝飾都靚靚。但呢度就一反傳統，全部cocktails都唔係sell樣，而係樸樸實實，簡單直接，方便快捷。

24款cocktails都係由團隊預先準備好，每款各有特色，甜酸苦辣口味同mocktail都有。例如呢排天氣凍，想要啲沉實厚身少少嘅酒，可以選擇以porter啤酒、dark rum、黑茶同斑蘭調製嘅Rum Stout，口感順滑，帶有果香，後勁跑出果仁香味。

清爽嘅代表就有Oolong Tea Collins，Vodka加上烏龍同柑橘，幽香中滲有微辣。

想再清新啲嘅話，就非Fancy Gin Collins莫屬。比上一隻再多多啲材料，Vodka同烏龍以外，仲有Gin、雪莉酒同香片茶，相比之下，呢隻感覺更fresh，好易入口。

至於想尋求多啲酒精嘅朋友，當然唔會滿足。 高階版：Saratoga介紹返。呢杯見佢加咁大粒冰就知有返咁上下。係威士忌加白蘭地加Vermouth加金巴利調成，酒鬼必試。

舖頭另外會有啲不定期轉款嘅季節限定或者secret menu，好似開飯仔去嗰陣，就有款濃濃菊花味嘅cocktail喇。

大家唔知揀邊款嘅話，可以先店員介紹同建議小試一杯仔，試啱喇，先至落柯打。而飲酒當然要有小食配襯啦~ 呢度嘅佐酒小食，同樣以方便為原則，刀叉筷子都可以唔使用，直接用手拎就得~ 好似港式魚蛋配日式燒醬，同避風塘燒豬頸肉咁，兩款都好香口。

Draft Land
地址：中環雲咸街63號巴力大廈地舖

文、相、片：Kar