幾時都話尖沙咀厚福街係食街嚟嘅，最近有呢間主打台式夜市小食同火車便當嘅新店進駐，白色門面加上盤栽裝飾好有文青Feel，而且食物分量足料，迷你肉燥飯嘅肉燥有差唔多三分一碗，麻糬波波裡面有地瓜或者紫薯蓉，柑橘百香鮮果茶啖啖都有百香果籽，大滿足。
 

麻糬波波（$16）

新店叫台北車站，專賣鹽酥小食同便當，選擇多元化。煙韌控必試呢串麻糬波波，一串有齊地瓜同紫薯兩款口味，炸過後麻糬外脆內煙韌，最加分嘅係裡面仲分別有地瓜同紫薯蓉，甜度適中而且相當綿滑，口感層次豐富。
 

蔥抓餅（$24）

除咗新派小食，亦有部分古早味選擇，好似呢份蔥抓餅咁。口感非常酥脆，不失麵粉香同蔥味，加埋酸辣醬更香口。唯一扣分點係炸得略油。
 

迷你肉燥飯（$22）

肉燥飯都可以當掃街小食？因為係杯裝迷你版吖嘛！細細份就唔怕食得太飽，當下午茶就最啱啦。肉燥係幾位老闆一齊研究同改良咗好多次嘅秘方，富豬肉同紅蔥頭香。而且肉汁夠多，肉燥分量又有差唔多三分一杯，撈飯完全唔使驚唔夠呀。
 

小時候鹽酥雞便當（$48）

便當方面有四款口味選擇，同樣都有香噴噴嘅肉燥，而呢份配埋鹽酥雞嘅係人氣No.1。鹽酥雞外脆內嫩，惹味得嚟又唔會過鹹。店家選用日本珍珠米，粒粒分明。而且仲有脆口帶酸嘅腌青瓜，便當食到一半嘅時候食返兩塊解膩就最啱。
 

 

初戀草莓歐蕾（$32）

紅色掛杯賣相非常搶眼，草莓歐蕾即係士多啤梨牛奶，打卡後記得將士多啤梨醬搞勻先飲。士多啤梨甜味自然討好，不時飲到少少士多啤梨果籽增加咬口。
 

柑橘百香鮮果茶（$34）

顧名思義以柑橘同百香果為主嘅水果茶，兩款水果都係酸酸甜甜咁，夏天飲返杯唔單止消暑仲可以開胃！而且水果分量十足，有士多啤梨、青檸等，百香果籽仲要多到好似珍珠咁啖啖都飲到。
 

台北車站
地址：尖沙咀厚福街9號豪華閣地下A號舖

文、相、片：Cathy