秋風起大家都會食返碗糖水潤返下,不過叫得糖水入面當然有唔少糖,所以一定要小心揀,唔係一個唔小心就會超標!消費者委員會同食物安全中心合作,測試部分食肆中常見糖水嘅糖含量,發現10種糖水樣本當中,平均糖含量最高嘅係楊枝甘露、番薯糖水同綠豆沙。
今次測試嘅糖水包括大家食開嘅紅豆沙、綠豆沙、番薯糖水、豆腐花、楊枝甘露、芝麻糊、椰汁西米露、腐竹雞蛋糖水、喳咋同合桃露。根據世界衛生組織建議,成年人每日糖份攝入唔應該多過50克。但楊枝甘露樣本平均每100克就有成11克糖,以佳記甜品一碗600克嚟計,食哂一碗就係66克糖,足足超標32%。
圖:tht_dawn
其次番薯糖水嘅糖含量平均每100克含10克糖,綠豆沙平均每100克含9.5克糖。當中以玉葉甜品嘅綠豆沙含糖量最高,每100克含13克糖,亦係所有檢測糖水樣本當中最高嘅。
咁有無比較少糖嘅甜品呢?答案就係豆腐花喇。特別係其中4個樣本因為買嘅時候無加糖漿,所以每100克都唔夠1克糖,其餘6個樣本每100克平均都係5.4克糖。所以想食得健康啲嘅話,記得唔好落太多糖漿或者黃糖喇。
開飯編輯推介:
1. 【專訪】西營盤平價點心飯店 67歲老闆堅持日做12小時
2. 9月份好評餐廳十強
熱門文章推介:
3. 牛頭角特色食店攻略
隨時接收最新資訊
讚好OpenRice專頁!