去唔到日本又想止下癮？觀塘呢間日式居酒屋就啱哂啦。佢係全港第一間有室內釣魚池嘅餐廳，餐廳用木船打造巨大嘅船坐席，內設兩個海水魚池。所有食物由高級日本料理老牌師傅主理，客人成功釣到魚的話，就可以自行選擇點煮嚟食，真係夠哂日本風味！

魚池入面有赤鯛、黑鯛、鱆紅同左口魚等，用$20買魚餌就可以開始釣！成功釣到的話就可以七折買條魚，然後師傅就會幫手炮製，鍾意活魚刺身定ShabuShabu都得，唔駛另外收費，加80蚊就可以改汁煮同炸物。

釣魚船屋刺身盛(松)($880)

刺身盛有池魚、拖羅、牡丹蝦、帶子、海膽同三文魚子等，刺身全部都厚切，而且夠新鮮，刺身會根據時令而有變化。

A4和牛∙馬糞海膽名物卷($168)

卷物上面係鹿兒島A4和牛蓉，馬糞海膽，入面就係蟹肉。一啖食落去好滿足！

花魚一夜干、海膽天婦羅($88)

花魚一夜干微微嘅鹹味，食到魚嘅鮮味。海膽天婦羅炸得香脆，仍然食到海膽鮮味。

釣魚船屋

地址: 觀塘駿業街56號中海日昇中心2樓H室

文：Yanica

相、片：Tom Li