各位日本抹茶焙茶控以後多個選擇啦！呢個由日本人創立嘅抹茶品牌最近去到尖東新商場開店，所有手打抹茶、焙茶、抹茶玄米茶飲品即席人手沖調，可以睇到店員用茶筅擦茶。而且仲新增軟雪糕，茶香十足之餘連脆筒都有抹茶同焙茶口味。貪心啲仲有芭菲揀，大滿足。
本茶由京都一位茶農創立，希望畀各位茶控近距離接觸同體驗抹茶，所以所有手打茶款都由店員即叫即擦。繼之前喺銅鑼灣開嘅期間限定店後，今次正式進駐尖沙咀。即席用茶筅擦茶可以將更多空氣打入茶湯當中，而且令茶粉完全溶化。
抹茶牛奶紅豆（$38）
抹茶同焙茶當然選用自家出產，呢杯抹茶牛奶紅豆就以香甜北海道十勝紅豆，配搭鮮奶同手擦抹茶，漸層效果搶眼之餘，抹茶回甘亦相當突出。抹茶無加任何糖，所以打卡後記得搞勻，由紅豆蓉嘅甜味帶起抹茶牛奶嘅味道。
焙茶奶泡（$38）
同樣係手擦茶，呢杯焙茶就配搭即場打發嘅牛奶同奶泡。因為焙茶同牛奶都有打入空氣，成杯焙茶奶泡口感同味道都更為濃厚！焙茶即係經過烘焙嘅綠茶，既有獨特嘅炒焙香，亦保留綠茶嘅清新。
本茶抹茶芭菲（$55）
除咗飲品，尖東新店仲首次推出抹茶同焙茶軟雪糕，心大心細就最啱點最豐富嘅芭菲杯。呢杯本茶抹茶芭菲最底係抹茶啫喱，之後係北海道十勝紅豆蓉、自家製抹茶軟雪糕、日本脆玄米、再一層抹茶軟雪糕，最後灑上抹茶粉點綴！抹茶軟雪糕嘅茶香依然明顯，配搭脆卜卜嘅玄米同香甜紅豆無得輸。抹茶啫喱雖然茶香無咁濃郁，但滑溜柔軟，可以增加口感層次。
焙茶軟雪糕（$38，可選抹茶脆皮筒/焙茶脆皮筒）（+小圓子+$5）
如果想自己配搭就可以點軟雪糕，抹茶、焙茶，同扭紋軟雪糕可以配抹茶脆皮筒或者焙茶脆皮筒，脆筒比較硬身同脆口，而且食落真係帶淡淡茶味，好加分。焙茶軟雪糕香氣不減，味道就比飲品略甜，而且有少少冰粒，但呢個價錢嚟計都算抵食。可以配搭唔同配料，小圓子即係白玉丸子，煙韌Q彈。
更多【新店直擊】： |
蛋糕套餐（抹茶雪芳蛋糕配自選飲品，31/10或之前特價$50，原價$60）
蛋糕套餐（焙茶雪芳蛋糕配自選飲品，31/10或之前特價$50，原價$60）
另一個抵食推介係蛋糕套餐，唔單止有新張優惠，而且飲品可以任揀冷熱唔同口味，再配兩件雪芳蛋糕，下午茶最啱呀。雪芳蛋糕口感輕盈，茶香亦比較Light，建議先食蛋糕再享用飲品。
煎茶山椒魚乾飯糰（$18）
煎茶炭燒雞肉飯糰（$20）
鹹食亦有得揀，新店供應四款口味茶香飯糰，加入唔同茶葉而且飯無加到醋，唔會蓋過茶味。煎茶山椒魚乾飯糰食得出煎茶嘅鮮味，加上山椒同魚乾嘅微辣同鹹味，惹味得嚟又唔會太鹹。煎茶炭燒雞肉飯糰裡面仲有雞肉，同煎茶估唔到又幾夾，而且增加咬口。
本茶
地址：尖沙咀梳士巴利道18號Victoria Dockside K11 Musea B2樓B201-34號舖
文、相、片：Cathy