香港食到嘅日式拉麵主要豬骨、魚介，比較新派有蝦湯、雞白湯，但專門店就唔多。佐敦有間新開拉麵店，獨沽一味賣雞白湯，而且裝潢豪華，似去咗日本fine dining餐廳咁！
店主Jacky家族本身做開大圍新強記燒鵝，專誠於佐敦舊區開店，舖頭門口圓形玻璃畫、店內一大幅金箔壁畫，空間大而且樓底高，與區內營造出很大對比，給人「嘩」一聲的驚喜。廁所更設於日式小庭園中，女廁有冷氣、電視，而且有齊所有清潔衛生用品，好貼心！
雞白湯容易令人聯想到跑馬地座銀，但金鶴的拉麵湯底由日本製造直送，以全雞熬足6個鐘，每兩三日到港一次。來到舖頭再加工，特意調得清淡啲，冇咁濃咁杰，似中式砂鍋雲呑雞，加入木魚湯後再用攪拌機打成泡沬，更加幼滑，鮮甜到可以飲哂成碗！
雞白湯拉麵 $98
雞叉燒選用日本薩摩赤雞製成，為低溫慢煮雞胸肉，以超聲波慢煮機製成，食落完全唔嚡，簡單以黑椒、鹽調味。另亦有豬肉叉燒，用火槍炙燒脂肪，將油香迫入肉中，同樣好食。加埋即炸牛蒡，雖然似座銀，但食落味道唔一樣。
雞白湯拉麵之外，亦有雞白湯沾麵、黑蒜醬油湯拉麵。前者以濃郁雞白湯配上粗身麵條，麵條煮熟後更要以冰水過冷河，保持硬度。沾麵湯亦細心以火爐上枱，食到最後仍然熱辣辣。而黑蒜醬油湯拉麵則以自家製黑蒜油加木魚湯製成，蒜香濃郁。
雞白湯沾麵 $138
黑蒜醬油湯拉麵 $98
另一皇牌為鰻魚飯，選用台灣出口到日本級數鰻魚，在店內自己劏，足有1cm厚切，肉質肥美而且富油香。再加上自家調製的鰻魚醬汁，一邊塗醬一邊燒，配上日本北海道七星米，味道濃郁，比唔少日本餐廳做得更用心。
活鰻蒲燒飯 $198
雖然餐牌選擇貴精不貴多，但仲有其他小食好似炸雞、炸餃子等供應。炸雞同樣用日本雞肉，而餃子跟足日本做法，食落juicy。
唐揚炸赤雞 $33、元祖煎餃子 $33
地址：佐敦九龍佐敦閩街三號地舖
文、相、片：Perrins
