天氣一凍，唔單止啱去打邊爐或者燒嘢食，亦方便去熟食中心覓食，因為唔怕無冷氣會熱吖嘛。特別係今次介紹嘅海防道臨時熟食小販市場，位於天橋底，衛生同通風都真係麻麻地。但如果唔介意環境差啲，你就可以食到平民香脆吉列豬扒、彈牙自家製牛丸，飲埋香滑瓦煲奶茶仲得！
香口吉列豬扒 東園
提到好味吉利豬扒，通常都會諗到日本菜餐廳，但呢間檔仔嘅出品勝在價錢貼地得嚟品質又高！豬扒先醃至入味，上嘅炸漿厚度亦適中，炸完皮脆肉嫩仲帶少少肉汁。吉利豬扒飯可以揀洋蔥汁或者咖喱汁，大部分人都會揀後者，貪佢香濃得嚟唔係得個辣字，試得過。
好評彈牙牛丸 德發牛肉丸
牛丸米周街都有無乜特別？少年你太年輕了，首先呢度嘅牛丸係佢地自家工場製造，同出面嗌貨嘅當然唔同。第二除咗牛丸之外，仲可以搭牛腩、牛雜或者牛筋，都係一樣價錢！牛丸細細粒，入口彈牙，雖然口感唔算滑牛味濃郁補返數。不過湯底就略嫌味精多咗少少，唔好飲太多啦。
更多【熟食中心尋寶】： |
罕見瓦煲奶茶 華香園
圖：fungpc1
<呢度嘅招牌菜有秘製豬扒同雞翼，不過開飯仔私人推介佢地嘅瓦煲奶茶！喺澳門茶餐廳已經買少見少，香港仲堅持用瓦煲沖奶茶嘅餐廳更加罕見。用瓦煲煲茶可以令茶香更濃而唔嗆喉，飲落自然更香。加多碗豬扒雞翼一丁就係充滿香港特色嘅下午茶喇。
足料咖吔西多 發興茶檔
圖：食盡香江
呢個臨時熟食小販市場有好幾個檔口都有咖吔多，想再特別啲嘅話可以嚟呢檔食咖吔西多，金黃色嘅西多士唔單止表面搽上咖吔醬，夾層一樣有咖吔醬！而且咖吔醬香而唔過甜，同香脆鬆軟嘅西多士好夾。香蒜吉列扒麵同樣香口。
<厚身咖吔多士 合香園
如果想食咖吔多嘅話，呢個檔仔都係唔少人嘅推介。老實講咖吔醬不過不失，亮點在於塊多士！多士用厚身去邊方包，焗過後外面微脆裡面軟綿，口感實在唔似坊間啲空氣麵包。另外仲有鮮牛多同混醬多，任君選擇。
文：Cathy