香港牛迷都算有福，食到唔少地方同品種嘅和牛，好似係澳洲和牛、日本鹿兒島、宮崎、佐賀、松阪牛甚至係飛驒牛等都有機會食到。銅鑼灣嘅Marble就主打來自宮崎縣尾崎和牛，為全港唯一供應尾崎牛專門店，最近更推出全新午市套餐，想食靚牛就要繼續睇落去！

尾崎牛少有以飼養者命名，用自家調配天然飼料餵飼，加上天然水源及獨家養殖方式，令牛肉脂肪及肉質都達最高等級，油花分佈標準等級達到A5 BMS12！每月生產量大約只有30隻，供應日本及全球高級餐廳，Marble就係全港唯一供應尾崎牛餐廳。

尾崎牛矜貴價錢唔平架，晚市過千蚊一位，所以食lunch就比較抵。$620套餐有尾崎牛他他、尾崎和牛清湯、尾崎和牛扒一份配溫泉蛋、日式炒飯及甜品。和牛以鐵板煎香，火候生熟度剛好，保持肉質juicy。油香及肉味並重，配上帶芥末味醬汁及自家醃製胡椒，中和油膩感。

Marble Set $620

更經濟之選可選新出午市套餐，$368五品定食有沙律、壽司、牛清湯、自選主菜及甜品。主菜燒澳洲和牛橫隔膜，煎至五成熟左右，脂肪當然比尾崎牛少，肉味特濃帶嚼勁。亦可以加$80轉成A4級日本和牛。

另一款主菜為甘鯛二重奏 ，以半炸半蒸烹調，外皮魚鱗脆得卜卜聲，肉質卻柔軟嫩滑。配上昆布醬汁及脆米，口感層次豐富。

套餐內其他食物都好講究，壽司每日不同，採訪當日為日本海膽，甘甜鮮味。大蝦沙律配露筍及乳酪汁，食落好清新。

日式炒飯以日本醬油炒至乾身，混和飯粒帶醬油香卻不會過濕，加上鹹香的高菜粒及切得細碎的炸蒜頭，忍唔住食晒成碗。

另一款午市套餐豪州和牛御膳，同樣選用澳洲和牛橫隔膜，牛丼舖滿牛肉片，沾上香甜的醬汁同吃相當匹配。$288包埋前菜、湯、漬物、甜品及咖啡。

而吉列和牛三文治套餐（$388）同樣好吸引，日本A4級牛肉以麵包糠外層炸香，中心呈粉嫩紅色，外脆內軟，而且中間加入了自製醃漬的蕎頭碎，微酸開胃又香口，食落唔算太膩。

餐廳設有14個吧座，開放式廚房可以睇住廚師煎牛，亦設有貴賓房。

Marble

地址：銅鑼灣禮頓道8號香港銅鑼灣皇冠假日酒店1樓

文、相、片：Perrins