「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？下次唔使再問一個人喺xx食乜好喇，等開飯仔幫你揀啦，今次講下大埔。
懷舊鵪鶉蛋燒賣 林記點心
一個人去街市熟食市場係幾啱，平時冇乜幾多個朋友肯陪你去呢啲麻甩地方。一個人未必食得到好多點心，咁就食啲必食嘅！例如懷舊嘅鵪鶉蛋燒賣，唔係淨返好多地方食到咋。皮薄，蛋香，好食呀。仲有排骨飯都不過係十幾蚊，但質素唔劣呀，半肥瘦，加埋甜豉油，好送得飯。
香口牛肉麵 九米香
又係街巿檔。隻碗寫住好難食牛肉麵，但實則好好食囉。真係要講返句，牛有牛味！呢度嘅牛肉麵湯底夠晒濃，牛肉又煮得入味而唔韌，厚切嗰下抵吖嘛，啲麵亦都好爽口彈牙。
鑊仔炒飯 老地方
去茶記通常都係牛麵丁麵，嚟呢間可以食啲唔同少少嘅——鑊仔炒飯。真係成隻鑊咁上呀，完全唔頹呀。有蟹籽炒飯有菠蘿炒飯之類，而且有大牌檔特色，就係夠鑊氣！呢度仲有冬蔭公湯底肥牛烏冬火鍋，你食得晒嘅咪即管自己同自己打邊爐~
快食車仔麵 萬利小食店
唔知點解，自己一個通常都係食麵。大埔有檔車仔麵唔錯，都幾多料揀，豬紅呀鳳爪呀呢啲唔係人人食嘅嘢，自己自私食唔錯。好入味，鳳爪仲有時會鬆咗骨先，好易食。另外叫多兜陳皮魚蛋都幾好，食得辣嘅記得加多啲辣醬。
天婦羅丼飯 炎天丼
呢期好似興食丼飯，大埔都有，不過呢間唔係刺身丼，係天婦羅丼，但一樣好吸引。間中係需要自己一個「毒」下。舖頭丼飯款唔算多，最吸引嘅係海鮮天丼，有魷魚、虎蝦等等嘅天婦羅，想話要海膽丼都有，海膽外面包住咗層紫菜，炸完出嚟係脆嘅，但依舊食到鮮味。仲有款又係會引死人嘅炸物叫炸流心蛋！咬開流蛋汁呀，都話咗自己一個人都可以食好西㗎啦。
文：Kar
【一個人開飯】系列：
一個人喺旺角食乜好？
一個人喺觀塘食乜好？
一個人喺銅鑼灣食乜好？
一個人喺尖沙咀食乜好？
一個人喺荃灣食乜好？
隨時接收最新資訊
讚好OpenRice專頁！