唔講大家未必知,原來每年6月1號都係世界牛奶日,沙田區呢間酒店餐廳為咗響應,將會推出以牛奶同芝士做主題嘅下午茶自助餐,當中就以火焰芝士車輪意粉同牛奶千層蛋糕最吸睛!
2+2 Café將於6月1號起逢星期六、日及公眾假期推出牛奶「芝」味下午茶自助餐,主打多款以世界各地牛奶同芝士入饌嘅美食。芝士控必試火焰芝士車輪意粉,將意粉同自選材料炒好後倒入巨型意大利巴馬臣芝士上,再加少少伏特加酒點火再快速攪拌,芝士香滿分!
另一焦點就係層層相間相當考心思嘅牛奶千層蛋糕,用幼滑澳洲牛奶打成忌廉,口感特別細膩。而彩虹芝士凍餅就勝在色彩繽紛,啱哂相機食先。
更多【飲食潮流】: |
脆皮牛奶用咗日本北海道3.6牛奶整成牛奶凍糕再油炸,外層金黃酥脆內裡牛奶流心濃郁香甜。而黑白牛奶卷蛋就將北海道3.6牛奶、澳洲牛奶同荷蘭黑白牛奶混合,忌廉嘅奶香濃郁得嚟甜而不膩,配搭有黑白乳牛圖案嘅鬆軟蛋糕相得益彰。
2+2 Café 牛奶「芝」味下午茶自助餐
供應日期:2017年6月1日起逢星期六、日及公眾假期至另行通知為止
供應時間:15:15 - 17:00
文:Cathy