菠蘿油同雞翼好似風馬牛不相及，但呢間雞翼專門店嘅銅鑼灣新分店最近就推出菠蘿油王子口味，將菠蘿油嘅牛油香同脆皮配埋落即叫即炸嘅雞翼上面，估你唔到又幾夾！其他特色口味亦繼續供應，以後銅鑼灣又多個掃街點啦。
 

雞翼山繼紅磡同旺角後，最近過海去到銅鑼灣開分店！小店專賣唔同口味嘅雞翼，全部選用巴西雞中翼，先醃過夜再即叫即炸，最後加上唔同醬汁同配料炒香。口味選擇多元化，當中唔少都好有港式風味。
 

菠蘿油王子雞翼（$38/4件）

銅鑼灣店優先發售嘅期間限定新口味，點將菠蘿油變成雞翼口味？答案係用牛油炒香雞翼後，加上自家製菠蘿油脆脆同牛油，脆脆食落同菠蘿包上面嘅脆皮一樣甜甜地，而雞翼本身已經醃過帶少少鹹香，一甜一鹹咁再加上半融牛油，香口之餘口感都好特別。
 

港式避風塘蒜香雞翼（$38/4件）

除咗招牌口味文青風玫瑰雞翼之外，其實其他口味都好有創意，好似港式避風塘蒜香顧名思義用咗蒜蓉、麵包糠同指天椒做配料，一炒成間舖都聞到陣蒜頭香啊！炸雞翼上再加炸蒜蓉，啖啖香脆，辣味啱啱好幾醒神，惹味之選。
 

 

我係鹹檸七雞翼（$38/4件）

港式飲品都可以變雞翼口味！檸檬茶同鹹檸七就分別變成港呢D友情萬歲檸茶雞翼同我係鹹檸七雞翼。鹹檸七口味比較清新，用鹹檸檬同汽水炒過，令雞翼外面沾上一層以甜味為主，又帶少少酸同鹹嘅醬汁，最後加少少番荽碎點綴。味道比另外兩款Light啲。
 

銅鑼灣店有吧枱畀食客企喺度食，有提供叉或者手套，方便大家好似店家Slogan咁「不要儀態，只想吃雞翼」！當然外賣返屋企或者Office食亦得，得咗。如果搵多幾個好朋友開心Share，可以點12件（$118）或者16件（$128），可以揀唔同口味配搭試多啲！
 

雞翼山
地址：銅鑼灣謝斐道520號渣菲大廈地舖

文、相、片：Cathy