香港人出名鐘意食海鮮，西環最近就開咗間以龍蝦作主打嘅海鮮專門店，用新鮮龍蝦烹調出唔同嘅菜式。所有菜式都選用加拿大波士頓龍蝦，肉質彈牙鮮甜，負責人話希望客人可以喺輕鬆嘅環境下，享用到價錢合理又高水準嘅海鮮。

餐廳裝潢以藍色為主調，有喺海島渡假嘅感覺，食都食得寧舍chill啲。

龍蝦奶油扁意粉Creamy Lobster Linguine ($248)

龍蝦奶油扁意粉加入龍蝦濃湯、蒜頭、羅勒、白酒及檸檬汁煮至入味，龍蝦味濃郁及白酒香氣味明顯，檸檬汁令奶油意粉味道增添一份清新感。意粉份量充足，兩個人食都綽綽有餘。

龍蝦Mac & Cheese Lobster Mac & Cheese ($218)

將意大利通心粉連同大量車打芝士一齊煮，然後面層再加上大量芝士拎去焗，真係好邪惡，芝士控一定不可錯過！不過都真係有啲heavy嘅關係，叫一份同朋友share就啱啦。

燒龍蝦尾Grilled Lobster Tail (60z) ($328)

想食啖啖肉嘅龍蝦，就一定要食呢個燒龍蝦尾！先煎香後再略作調味，龍蝦香口而且肉質爽口彈牙，亦食得出鮮甜味。配埋沙律及薯條就唔怕唔飽～

龍蝦包Lobster roll ($248)

龍蝦包可謂呢幾年嘅人氣食品，呢度嘅龍蝦包雖然就唔係啖啖龍蝦肉，但將龍蝦粒及蔬菜混入沙律內，味道比起坊間食嘅更fresh。

炸蟹餅 Crab Cakes($148)

蟹餅炸得香口，蟹肉佔大多比例，點埋他他醬食又幾惹味。

Lobster Shack   

地址: 西環西營盤第二街6-8號地舖

文: Yanica

相、片: Tom Li