「得閒飲茶」好老土？未必，好似呢間由香港茶藝師開設嘅茶室就走簡約舒適路線，最近去到尖沙咀開新店。唔單止可以對住維港海景嘆即沖原葉靚茶，仲有其他以茶入饌嘅點心，好似雪糕同葛餅，飲中式茶都可以好Chill好Relax！
 

瑜茶舍新店位於尖沙咀誠品生活2樓，可以選擇坐喺吧枱前欣賞茶藝師泡茶，亦可以坐喺另一邊睇住天星碼頭海景。茶飲同茶點每個月都會調整，10月就有八款現沏熱茶、三款冷泡茶同三款茶點供應。亦有原片茶葉、茶曲奇等可以買走。
 

即點即沏熱茶

秋冬最啱飲杯熱茶，大家可以睇下Menu上各款茶葉嘅介紹，亦可以聞下邊款茶葉嘅香味最啱心水。所有熱茶都係由茶藝師用品牌原片茶葉即點即沖，以保留最多茶香。
 

（熱烘茶湯）陳皮普洱（$88）

如果平時飲開茶嘅話，推介你試呢款糅合2012年成熟陳皮同2008年熟普洱嘅雲南陳皮普洱茶。茶湯顏色紅潤明亮，聞起嚟有相當濃郁嘅陳皮香，飲落先有陳皮味，普洱嘅甘味慢慢會越飲越突出。
 

12小時冷泡茶

（左至右）（沁甜茶湯）金駿眉（$48）、白牡丹（$58）、武夷大紅袍（$58）

相反平時比較少飲中式茶嘅話，可以由近年大熱嘅冷泡茶入手。金駿眉同白牡丹都係比較受歡迎嘅選擇，前者係嚟自福建桐木關經過改良嘅紅茶，冷泡後帶有獨特嘅花蜜香；後者係發酵度較低嘅白茶，有少少杏仁同杏花香味。兩款都係甜度較高，非常易入口。而武夷大紅袍經過12小時冷萃亦大大減低苦澀味，但保留咗炭焙香氣，茶湯比另外兩款醇厚。
 

期間限定茶點

大紅袍葛餅（$48）（週末限定）

茶室亦有供應幾款點心畀大家配茶，首推同旮旯合作推出嘅大紅袍葛餅！打開紙盒一睇就知道落咗唔少大紅袍茶葉，食之前可以按自己口味加入黑糖蜜。口感柔軟嘅葛餅配搭回甘濃郁嘅大紅袍，滿足感十足。合作推出嘅茶點另有紅豆芝麻餡嘅茶餅（$35），可惜開飯仔拍攝當日未有供應呢。
 

大紅袍義式雪糕（$50）

而雪糕相對起嚟就比較易入口，同樣都係大紅袍茶，不過拍檔換上用澳洲脫脂奶製造嘅Gelato，牛奶香加上茶香頗有奶茶嘅感覺。最值得讃嘅係甜度適中唔會蓋過茶味，而且Gelato比一般雪糕更少空氣，口感更綿密幼滑。茶點每個月都會更換口味，以保持新鮮感。
 

無論係鍾意品茗，定平時比較少接觸中式茶嘅朋友都好啱嚟飲杯茶，一方面因為呢度對住海景夠哂Relax舒適，好有療癒Feel。另一方面係茶藝師都好樂意介紹各款茶葉同沏茶嘅知識，好似發酵度比較高嘅茶係沖茶嘅時候需要用熱水暖壺，冷泡茶可以減少茶湯嘅咖啡因等等，好似上茶藝入門課咁！
 

瑜茶舍
尖沙咀梳士巴利道3號星光行誠品生活2樓L230號舖

文、相、片：Cathy