講起西多士，大家可能第一時間諗起花生醬呢啲經典口味，但近年好多餐廳都開始玩創意，加入唔同餡料，將西多士升級到更邪惡又爆餡！今次就推介幾款創意西多士，等大家試吓新滋味～

金沙朱古力流心西多士 老荔冰室

餐廳主打創新嘅港式茶記美食，當中金沙朱古力流心西多士好有人氣！西多士炸到金黃香脆，外層酥脆得嚟裡面仲保持鬆軟，切開之後朱古力流心即刻湧出，每一啖都係濃厚嘅朱古力味，加上面層滿滿嘅朱古力脆脆，口感好豐富～呢款無論賣相定味道都好高分，特別適合一班朋友開心share，打卡一流。

邪惡榛子醬西多士 雪山冰廳

Nutella本身已經夠好味，加落西多士就更加升級～一切開會見到薄薄一層榛子醬，濃郁嘅榛子香同西多士本身嘅牛油香氣，每一啖都充滿滿足感。怕太甜唔建議落糖漿，就咁食已經夠香濃，甜品控不可錯過呀！

原創流心西多士 周記點心

出名抵食又有創意嘅點心店，佢哋嘅流沙西多士更加係一大亮點！店舖有奶黃、紫薯同黑芝麻三款口味揀，每款都各有特色。奶黃流沙西多士一切開就見到滿滿嘅奶黃醬湧出，濃郁嘅鹹蛋黃香氣加上外脆內軟嘅西多士，真係每一啖都令人滿足；紫薯流沙西多士帶自然甜味，唔會過膩，食落仲有陣淡淡嘅紫薯香；黑芝麻流心就更加香氣濃郁，芝麻醬幼滑香濃，帶微微堅果香氣。

黑芝麻西多士伴雲呢拿雪糕 香港永年車仔麵茶冰廳

唔單只車仔麵受歡迎，佢哋嘅甜品都好有驚喜！其中黑芝麻西多士伴雲呢拿雪糕就係必試之選，炸到金黃香脆嘅西多士，夾住滿滿嘅黑芝麻餡，香濃幼滑但唔會過甜，配埋面層嘅雲呢拿雪糕，絕對係冰火交融嘅完美組合！

蛋白腐乳西多士 銀龍咖啡茶座

本地經典冰室，除咗手拉奶茶聞名，佢哋嘅蛋白腐乳西多士更加係人氣之選～呢款西多士將傳統味道玩出新花樣，上枱時熱騰騰，外層炸得香脆，內裡夾住腐乳同蛋白，入口帶淡淡腐乳香氣，唔會過濃，鹹甜交錯，加埋少少煉奶更加突顯層次，意想不到地夾，係令人一試難忘嘅創意西多士！

文：Yanica
編：Cathy