凍冰冰最好就係打邊爐！呢排又勁多火鍋店開張喎，啱晒！今次呢間最啱牛魔王去，主打騸牯牛呀呢度，有成10款唔同嘅部位可以選擇，連牛刺身都有呀！

(左起)牛頸脊、腩包、邊抓

 牛頸芯刺身

騸牯牛即係被閹割嘅公牛，脂肪分佈較平均，肉質嫩滑而牛味亦較濃香，香港每日淨係供應14隻㗎咋。而呢間火鍋店每日都會入貨，不過就限量得十幾份，為牛而去嘅朋友，穩陣就早一日訂定啦。好似呢盤騸牯三寶咁，疊到成座小山丘咁，一出場已經好有霸氣。師傅建議由最外圍嘅邊抓食起，然係中間嘅腩包，最後就係核心嘅牛頸脊，咁樣就會食到愈嚟愈濃味嘅牛肉喇，另外仲有牛頸芯刺身添。

除咗牛以外，海鮮亦係一大亮點。自問係海鮮控嘅朋友，呢盤海鮮拼盤係你㗎喇，超大隻嘅南非鮑魚，鮮甜爽口，仲有沙巴龍躉、沙白同青龍蝦，原隻上，仲郁緊，好新鮮下。

 桂花蚌

 北海道鮮帶子

 蔬菜拼盤、黑松露鮮蝦水餃

 即炸手工響鈴卷

其餘配料都有成百種選擇，菜呀肉呀手打丸呀自家製餃呀等等，望住張點菜紙，選擇困難症瞬間發作！

至於湯底，都係有10幾款選擇，同大家介紹其中三款，都係滋潤系列嚟。招牌亞古鍋，以熬足一日嘅老雞湯做base，再連埋花膠、螺頭、碎瑤柱同藥材一齊上，淥嘢食之前最好先飲返一兩碗！

另一款花膠湯底係花膠碧綠豆腐鍋，碧綠豆腐係菠菜蓉搭自家製豆腐，都幾特別。不過可能好多人都會有個疑問，菠菜同豆腐唔係唔可以一齊食嘅咩？係。不過師傅解答話因為普通豆腐喺製作時會加入石膏，而呢度嘅豆腐就只係純用黃豆，唔會同菠菜嘅草酸產生化學作用喎。

至於貴妃鍋，就有大大隻烏雞喺度，而且，內有乾坤呀。剪開隻烏雞，原來師傅預先收埋咗好多藥材：當歸、鮮人參、蟲草花、杞子等喺入面，令到成隻雞都滲滿藥材嘅味道。

呢度環境幾大，有成7000呎，但得125個位，所以係幾闊落呀。行入啲仲有個bar添，有調酒師製cocktail呀！呢杯有幾片玫瑰花瓣喺入面嘅Sakura Dream，以vodka、lychee liqueuers、lychee puree同rose syrup調成，甜得嚟滲有花香，好啱女生飲。至於男生，就可以試下Spicy Hawii，真係辣㗎，幾刺激，不過辣得嚟都有啲椰子同菠蘿嘅甜中和返下。

亞古鍋
地址：銅鑼灣登龍街1-29號金朝陽中心2期Midtown 27樓

文、相：Kar