上環呢間新店比起一般餐廳，更似一間包羅萬有嘅概念店，嚟到可以買到嚟自唔同地方嘅水果、零食、醬料等。食物有方便Grab & Go嘅三文治、Detox果汁等，亦有可以坐低一齊分享嘅主菜同甜品，推介變奏版西班牙海鮮燉飯，海鮮落得夠重手啖啖鮮味！
 

#HAPi係一間以「Happiness」為主題嘅生活概念店，零售包括嚟自唔同國家嘅食品、家品、鮮花，甚至係時裝！概念店之後亦希望同唔同藝術家合作，舉辦展覽或者畫展，最近就有展出Myra Yi嘅畫作。餐廳方面請嚟大廚Ashvin Chow坐陣，唔少菜式都同概念店互相呼應。
 

意大利布袋芝士·原種蕃茄配青醬（$89，VIP $59）

顏色豐富令人食慾大開嘅沙律，特別選用唔同顏色法國蕃茄帶出「Happiness」主題，食落飽滿多汁，酸度適中，配搭青醬更加清新。而意大利布袋芝士外層煙韌，切開裡面非常軟滑細膩，奶香突出增添香味。
 

慢煮雞胸配黑松露芝士醬三文治（$45，VIP $35）

上枱就聞到黑松露嘅幽香，烘過嘅拖鞋包外脆內軟，加上以慢煮保持柔軟口感嘅雞胸肉口感幾夾。味道就主要嚟自黑松露芝士醬，黑松露獨特香氣同芝士嘅鹹香配搭得宜。
 

西班牙海鮮燉飯（$168，VIP $98）

相當有驚喜嘅招牌菜，西班牙圓米用龍蝦湯煮過，加上唔同海鮮配料再焗，令飯粒充分吸收海鮮精華。海鮮有鮑魚、蝦、八爪魚、魷魚等等，亮點係上面嘅炸北歐小蝦，食落更香口而且增加酥脆口感。飯粒略嫌太軟，但勝在海鮮鮮味濃郁而唔過鹹，加上柚子皮平衡膩感。
 

 

自家製金黃蘋果撻（$48，VIP $38）

另一推介係蘋果撻，上面嘅「花」係用一條中間無切開嘅蘋果果肉砌成，相當考驗廚師刀工，同時配合返概念店有得買花！焗過嘅蘋果味道更香甜，同時保留爽脆多汁嘅口感。配搭柔滑嘅吉士、低脂忌廉，同鬆脆帶牛油香嘅撻皮，口感豐富、香甜而唔膩。
 

Latte（$38，VIP $28）

選用House Blend咖啡豆，咖啡香濃郁同時帶少少水果酸味，口感柔滑而且完全唔苦，係非常易入口嘅味道。
 

概念店同餐廳所有項目都有兩個價錢，皆因呢度係行會員制，可以按自己需要揀唔同VIP Plan呀。
 

#HAPi
地址：上環普仁街11號地下2-4號舖

文、相：Cathy