鍾意食東南亞菜嘅話，最近又多間餐廳可以一試啦。油麻地新開一間主打馬來西亞菜嘅茶室，招牌肉骨茶同叻沙都有多款選擇，小食亦夠多元化。定價合理味道又正宗，難怪已經成為部分居港馬來西亞人嘅新食堂。
 

峇峇娘惹暫時係油麻地區內唯一一間馬來西亞餐廳，餐廳經理係馬來西亞人，喺出品上面都落咗唔少心機。唔少食材同香料都從檳城或東南亞各地入口，聽聞唔少馬來西亞人嚟試過之後都話味道夠正宗呀。
 

豬肋排星洲胡椒肉骨茶（大）（$62）

餐廳主打之一係肉骨茶，屬於胡椒味道偏重，藥材味較輕嘅種類。湯底用上等白胡椒盅碎後加入蒜頭等熬成湯底，等客人點單後再逐碗翻熱。肉骨茶可揀豬肋排、豬潤、梅頭、五花腩唔同部位，當中以豬肋排最受歡迎。
 

肉骨茶飲落先有胡椒嘅辣味，最後先有少少藥材甘味滲出，唔單止一啲都唔油膩，秋冬飲有助驅寒，亦更突顯出豬肉嘅鮮甜。豬肋排可以點黑醬油食，更有馬來西亞風味。覺得唔夠喉嘅話，仲可以用優惠價$8加湯！
 

海南雞滲滲叻沙（$68）

餐廳另一推介係滲滲叻沙，叻沙湯底用蝦米、南薑茸、椰奶等十幾款食材熬成，味道香辣帶椰奶甜香。而呢度嘅滲滲係油麵加米粉，配惹味嘅叻沙湯底更滋味。呢碗叻沙有兩個Highlight位大家唔好錯過，一係索哂湯底精華嘅豆卜，二係切碎嘅叻沙葉，撈埋一齊食更富香味！
 

星洲魚丸濕撈米暹（$34）

米暹其實即係比較幼嘅從化米粉，比一般香港人食開嘅米粉更掛汁，所以最啱拎嚟做撈麵。配以味道酸辣有鹹香嘅秘製撈米暹醬料，相當開胃。而白魚蛋口感相當彈牙，有魚味又唔會食到一口粉，蝦肉亦夠爽口。
 

叻央多士（$22）

小食方面，最受歡迎嘅有呢碟叻央多士，同馬來西亞嘅一樣選用麥包，烤完比一般方包更香脆！開飯仔就覺得多士邊位最好食，脆得嚟又有少少韌，配幼滑香甜嘅叻央醬就最啱。
 

 

咸油酥餅配咖喱汁薯仔（$22）

咖喱飯大家或者就食得多，原來配油酥餅一樣咁夾。呢度嘅油酥餅夠酥脆又唔油膩，咖喱亦夠辣。比較可惜嘅係咖喱汁如果香料味道再突出啲嘅話，味道層次會更豐富。
 

檳城桔子酸梅特飲（凍）（單點$18，跟餐$10）

馬來拉茶（熱）（單點$16，跟餐$8）

飲品亦相當有馬來西亞特色，桔子酸梅特飲用嘅桔仔更加直接由檳城進口，味道鹹酸醒神。而拉茶嘅茶香同奶滑平衡得唔錯，甜度亦適中，係一杯有水準嘅拉茶。
 

峇峇娘惹
地址：油麻地彌敦道501號地舖

文、相、片：Cathy