無論係同朋友睇午夜場，定因為夜收工所以要食宵夜，唔少人都會選擇去旺角，食飽再飛小巴返屋企。開飯仔就幫大家搵咗以下六間開到凌晨兩點，甚至清晨六點嘅餐廳，從日本菜到巷仔雞粥都有，總有一間啱你心水。
 

飲夜茶食創意點心　　老點點心竹筒飯

圖：Jessica_LamLam

喺旺角想飲夜茶都有好幾間揀，而呢間就勝在點心有創意得嚟水準亦唔錯。有睇我地開飯餐廳專訪就知老闆落足心機，班蘭馬孻糕搶眼之餘又有班蘭葉獨特嘅幽香，吾係老點小漢堡嘅蝦肉夠哂彈牙。咸香黑魚子蒸燒賣、脆皮麥心小煎堆同竹筒飯亦係推介，營業至凌晨兩點。
 

「潮」食潮州美食　　心夜來潮

圖：蝴蝶結姐姐，Kikivicki

呢間樓上潮式打冷店口碑一向都唔錯，招牌潮汕海鮮砂鍋粥味道鮮甜粥底軟綿，不過分量比較大。想食少啲嘅話可以一試小米餃，餃皮係薯粉而餡就係豬肉同大地魚粉，所以食落外皮煙韌裡面Juicy有肉香。仲有醬鹵拼盤、爆炒醬啫秋葵、潮州鴨蛋煎蠔烙等選擇，營業至清晨六點。
 

巷仔好味雞粥　　輝記雞粥檔

圖：Kan Lee

老實講，呢度嘅環境同衛生認真麻麻，但唔介意坐巷仔嘅話，你就可以食到呢碗好味雞粥喇。雞肉嫩滑而粥底夠綿，最緊要嘅係成碗都充滿雞嘅鮮甜味。唔夠飽可以食多碟炒麵，鑊氣足所以食落乾身但唔會太硬，拍得住大牌檔出品。營業至清晨六點。
 

香噴噴惹味串燒　　安安燒

圖：VanillaBean

一大班Friend不妨食串燒，一嚟肉類海鮮蔬菜樣樣齊，二嚟食住串燒飲啤酒咁至夠開懷吖嘛。嚟到呢間串燒店可以先嚟碟蒜蓉燒茄子等蔬菜墊下肚，肉食呢就以燒牛舌同燒魚皮餃最受歡迎，女士可以食埋燒棉花糖夾餅做甜品，男士就可以嚟碗三重芝士撈丁做主食。營業至凌晨三點。
 

選擇多日本料理　　鳴門魚市場居酒屋

圖：Bur

雖然餐廳名叫居酒屋，但打開Menu一睇選擇比一般居酒屋多，剩係定食都有涮牛肉鍋、海鮮飯同咖喱飯等，當然亦唔少得刺身、小食同沙律等。可以留意一下餐廳推廣，之前嘅三色海膽飯同海鮮浜燒優惠都幾抵食㗎，營業至凌晨兩點。
 

實驗室Fusion西餐　　Lab 66

圖：cindyk88

唔單止餐廳名叫實驗室，裝修走工業風加實驗室風格，連菜式嘅食材配搭都相當創新。菜式選擇貴精不貴多，芒果軟殼蟹卷夠清新，帆立貝墨汁意粉帶墨汁香又做到al dente，66自家漢堡嘅Juicy牛肉配埋香脆薯條無得輸。嗌多杯香濃Dark Choco做甜品夠滿足。營業至凌晨兩點。

文：Cathy