任食火鍋有好多間，但你估個個都想任食火鍋咩？識食嘅火鍋迷並不追求任食，反而追求有質素、有味道嘅火鍋。呢間位於尖沙咀嘅日式火鍋店除咗賣火鍋、賣味道，仲要賣誠意。購入不少高質食材之餘，全店更採用法國staub鑄鐵鍋，出手相當闊綽，犀利！
打開餐牌一睇，見到有Sui An藥膳鍋($108)、番茄辣鍋($108)、胡椒香茅檸檬鍋($98)、豆腐豆乳鍋($98)及味噌昆布鍋($88)6款火鍋湯底選擇。餐廳亦相當大手筆，買入法國staub鑄鐵鍋，火鍋唔怕黐底之餘，亦令火鍋溫度控制喺65度至75度之間，客人就可以品嚐到食材嘅最佳味道。
開張以來，最多人柯打嘅就係豆腐豆乳鍋，用自家製高湯、加埋豆乳、鮮腐竹、蘿蔔、芽菜及日本豆腐。味道不算濃，但勝在豆香十足，不會奪去其他火鍋配料嘅鋒頭。
另一推介Sui An藥膳鍋，湯底由當歸、黨參、淮山、紅棗、杞子、沙參、玉竹、北芪、龍眼肉、茨實、薏米等藥材，再加入雞骨、豬骨、豬肉熬煮超過48小時而成，補而不躁。而且味道較為溫和，仲有少少甜味，與濃味嘅紅肉好夾。
火鍋配料選擇約有30幾款，但用料上盛。先講港人熱愛嘅牛肉，餐廳選用澳洲和牛及黑毛牛交配而成嘅牛隻，令牛肉既有和牛嘅油脂感，又有黑毛牛嘅肉味，而且八成飼料都係以麥為主，脂肪分佈平均。客人可品嚐到6個牛肉嘅不同部位：特上牛骨肉（左）、肩頸脊、黃瓜條（右後）、特上肩肉（右前）、肋眼芯及特上牛脷，開飯仔就試食咗特上牛骨肉、黃瓜條及特上肩肉。
特上牛骨肉（左）係牛隻3條主肋骨之中嘅部分，脂肪呈雪花狀，亦好平均，所以口感幾有油香，價錢為$118；黃瓜條（右）即牛肩位內側，好幼身，食落好似牛柳咁軟腍，價錢為$98。
而開飯仔最鍾意就係特上肩肉($98)，脂肪不太多，但好有牛味，薄切令牛肉更有嚼頭。
必食推介清酒雞中翼($88/6隻)，選用來自東南亞嘅41日走地雞，用天然方法飼養，不含激素及化學飼料。以日本清酒去浸漬雞翼至少48小時，令酒氣完全滲入雞翼之中，雞翼味道亦更覺清香，肉質好有彈性。
自家製嘅牛肝菌雞肉餃($58/6粒)，牛肝菌味道獨特，與走地雞嘅嫩滑雞髀肉，好夾。
五花腩肉油脂感重，好有嚼頭，價錢為$88。
（左）即點即炸嘅炸響鈴花($58)，賣相與一般響鈴不同，炸起腐竹皮再砌起響鈴花，頗有心思；（右）鮑魚來自南非，厚肉兼彈牙，一隻價錢約$88至$98左右。
來自日本廣島嘅蠔($88/6隻)，蠔肉肥美而鮮甜，放入火鍋之中，煮約2分鐘就食得。
素菜籃($68/小、$88/大)都擺放得好美觀，入面會有6、7款配料，款式會不時轉換，採訪當日有豆苗、紫椰菜花、白菜仔、秋葵、金菇、雞髀菇、本菇及粟米。
醬料選擇不多，只有蔥花、蒜蓉、芝麻醬、辣椒及醬油。開飯仔建議醬料不宜混得太多，唔係嘅話就食唔到配料本身嘅味道。
座位不多，只有48個座位左右，但地方比起一般火鍋店闊落，座位亦比較寬敞。而且為配合柔和主題，餐廳以淺色木系傢俬、綠色植物等裝潢，予人感覺舒服輕鬆。
餐廳有一處文創區，擺放好幾款由餐廳自家調配嘅花茶，以及由本地藝術家寄賣嘅日本陶瓷碗碟，鍾意嘅客人更可以買走架！
翠庵
地址：尖沙咀堪富利士道6-6A號1樓
註：每位須收取$28茶位醬料費；晚市設最低消費$180/位；另設加一
文：Joy