平時食開嘅糖水甜品店一係中式一係西式或者兩者都有賣，但銅鑼灣呢間新糖水店就三者都唔係。餐廳賣點係以西式擺盤方法呈現中式糖水味道，好似平時食心太軟就多數係朱古力，但呢度就變左合桃露，真係夠哂特別！

合桃露($78)

以Valrhona黑朱古力蛋糕搭配合桃露，心太軟流心效果唔錯，內層嘅合露桃唔會過甜，有淡淡合桃香。外層嘅黑朱古力蛋糕尚算鬆軟。

招牌菠蘿包($38)

呢款菠蘿包唔係平時茶餐廳果隻，大廚注入自家製菠蘿吉士醬，再加左啲真菠蘿喺包內，食落就fresh啲味道又多層次～

木瓜雪耳糖水($68)、果皮紅豆沙($68)

聽到個名唔好以為好似平時咁一碗碗，呢度嘅木瓜雪耳糖水同果皮紅豆沙都係碟上架！木瓜糖水呈現布甸狀，配搭雪耳、糖漬木瓜同意大利軟芝士，糖水就交比食客自己落，咁就可以自己調較甜度啦。果皮紅豆沙上面一塊塊就係果皮，下層就係糯米丸子同抹茶雪糕。

黑芝麻湯圓($58)、焦糖香蕉抹茶蛋糕($58)

芝麻湯圓糯米皮煙韌，內層嘅黑芝麻都濃郁。蛋糕上層香蕉用焦糖烤過，有陣陣焦糖香，不過蛋糕就稍為硬咗少少啦。

豬腳薑炸豬皮雪冰($48)

聽到個名都嚇一嚇？呢款雪冰靈感來自廣東人產後補身同分享BB出生喜悅嘅文化，雪冰面層配上一片香脆豬皮，薑味較重，帶少少醋香。

四川花椒焦糖煙肉雪冰($48)、特濃牛奶糯米酒雪冰($48)

帶有花椒香辣味嘅雪糕，搭配糖漬煙肉，口感豐富。牛奶雪糕經糯米酒浸泡而製成，酒味香濃。

炸蠔豉香菇春卷配陳醋($58)、磨豉醬雞頸肉脆雞皮飯($98)

除咗甜品，仲有喺午市同晚市時段供應主菜同小食。磨豉醬雞頸肉脆雞皮飯磨豉醬味道香濃，雞頸肉都夠滑。春卷表現都唔錯，外皮鬆脆，食落有淡淡蠔豉香，配埋陳醋食又清新啲。

餐廳喺3月2日正式開張當日會喺下午3點3至5點送出100個招牌菠蘿包，先到先得啊！

親愛吃

地址: 銅鑼灣百德新街27-47號及記利佐治街11-19號 Fashion Walk地下17號舖

文、相、片: Yanica