朝早飲杯咖啡係好多人嘅指定動作，今日飲latte，齋啡定cappuccino好？唔使咁煩惱，想轉轉口味有啲新意，幫襯下獨立咖啡店飲杯創意咖啡都係一個唔錯嘅選擇！
位於青衣城嘅呢間咖啡店並非連鎖店，由台灣咖啡大師林東源親自監督，多款咖啡配方都經精心設計，採用嚟自瓜地馬拉、薩爾瓦多同印度莊園嘅精品咖啡豆，以中偏深度烘焙，令沖出嚟嘅咖啡帶淡淡柑橘、堅果、太妃糖同奶油香氣。
呢度每3個月就會推出3款創意咖啡，今次主題係「童年」，一齊睇下有咩獨特限定咖啡陪大家度過童年最愛既夏日啦！
芝味童年
咖啡上面灑上童星點心麵，相信好多人都對呢個配搭感到訝異。巴馬臣芝士配上幼滑榛子咖啡，頂層灑上小學時代必食嘅童星點心麵，加入少量胡椒粉，味道鹹中帶少少辣，脆卜卜嘅點心麵為咖啡增添口感同層次感。以火槍燒溶嘅巴馬臣芝士鹹味同含果味嘅榛子咖啡融合，鹹味較為突出，雖然未必個個接受到，但配搭新奇，鍾意芝士嘅咖啡迷可以挑戰一下。
椰林國
椰子樹下享受陽光與海灘絕對係夏天最高享受，呢款椰林國正正就將完美嘅海島假期感覺融於咖啡之中。以清甜嘅椰皇作為基調，即開新鮮椰皇水配上香滑泡沫咖啡，頂層再灑上椰絲，味道清甜同時令咖啡香更突出。用椰子殼飲咖啡別有一番風味，仲可以食下椰子肉𠻹。
芝麻開門
中式糖水芝麻糊食得多，呢次加入雙份濃縮咖啡，配埋濃滑純牛奶，成為一杯帶雲石紋嘅咖啡特飲。芝麻香氣濃郁突出，配咖啡非常相襯，牛奶令咖啡口感更幼滑，甜膩口味適合作為夏日消暑特飲。加上黑芝麻含有豐富維他命E，有助抗衰老同養顏，注重護膚嘅人士一定鍾意。
秘密的彩蛋咖啡
要獲得品嚐秘密彩蛋咖啡嘅資格，首先要飲齊以上3款童年系列創意咖啡，集齊3杯咖啡嘅創意金幣，就可以揭開彩蛋咖啡嘅神秘面紗。呢款秘密彩蛋咖啡其實係爆炸糖提子咖啡，酸甜提子汁配冰凍濃縮咖啡，味道清爽解渴，加上跳跳爆炸糖感覺好有新意！
Goldblack Ice cream
除咗咖啡，呢度仲有gelato食。所選用嘅gelato為香港本地新鮮製作，唔含防腐劑，分別有豆腐口味同朱古力味。Gelato仲附有一杯expresso畀大家淋落雪糕上面食，溫熱濃郁嘅咖啡撞上雪糕，令雪糕帶滿滿咖啡香，味道更有層次感。
