中環呢間拉麵店，最近重塑餐廳形象，加入居酒屋元素。除咗供應店內原有人氣嘅手工雞白湯拉麵外，加入唔少居酒屋食物同特色清酒，港島區嘅朋友放工後可以嚟食嘢飲酒啦。
餐廳裝潢以時尚和風設計為概念，油漆傢俬配深啡木作主色，同時設有戶外座位，呢排天氣開始涼涼地，坐戶外別有一番風味啊～
醬油雞白湯拉麵($138)
以雞白湯底為基礎加入醬油，除醬油味外，亦有辣味噌、蝦味噌及柚子等選擇。湯底加入乾蔥、木魚粉同黑芝麻油調味，麵條粗身彈牙入味。另外拉麵配料由叉燒換上原隻慢燉雞髀，雞髀炆得軟腍，用筷子輕輕一篤就骨肉分離，肉質仲夠嫩滑。
辛辣免治雞肉拌麵($123)
免治雞肉拌麵配料包括雞肉碎、洋蔥、香蔥、紫菜及生蛋黃等，加入秘製辣油，味道香辣惹味，配埋粗身彈牙嘅麵條啱啱好。
三色刺身盛合($218)、昆布腌三文魚($118)
食日本菜又點少得刺身呢！平時食刺身多數都係點返普通日式醬油，呢度就特別少少，上枱時會上附上一個漏斗小工具，等食客可以自行將幾款口味未經加工嘅麵豉醬，調配出自己喜歡嘅醬油口味。
酒糟炸雞($88)
將原隻鮮雞切成雞件後，以浸過夜清酒酒糟及鹽漬為醃製，再拎去炸。炸雞外皮香脆，而且有陣陣酒香，配上清酒真係一流。
京式味噌熱沾醬($78)
有啲似芝士火鍋食法，將新鮮蔬菜如洋蔥、大蔥、青瓜等材料沾醬食，食到蔬菜原味之餘味道更豐富。
另外餐廳仲有多款清酒選擇，叫返幾款居酒屋小食配sake飲就完美啦！
地址: 中環砵甸乍街45號The Steps ‧ H Code地下5號舖及開放空間
文: Yanica
相、片: Tom Li