成日都心思思想買杯手搖飲又怕有罪惡感？尖沙咀呢間台中過江龍品牌就無呢個問題！茶底選用唔同穀物同豆，每款都有唔同功效，又用桃膠、黑木耳等有益食材嚟取代珍珠，好飲有咬口仲更健康呀。特別推介決明子同薏仁系列，前者味道似咖啡但無咖啡因，後者有助美白祛水腫好啱女士飲㗎。
 

植作茶品牌嚟自台中，由兩位香港90後女生帶到嚟香港。首店位於尖沙咀山林道，裝修以木同自然風格為主，唔單止希望畀大家打卡咁簡單，仲擺咗唔少本地文創作品，好似獨立樂隊嘅單曲，文學雜誌等等，連畀大家休息嘅木凳都係同香港木工坊訂製，落足心思。
 

黑糖桃膠決明子鮮奶（$32）

品牌一大特色係用低温烘焙嘅豆穀去取代平時飲開嘅茶飲去沖茶，所以全部都無咖啡因，好似呢杯就用決明子茶配搭黑糖桃膠同鮮奶。決明子有助清肝明目，飲落帶少少類似咖啡嘅甘苦味同帶少少麥味，加埋柔順嘅牛奶更易入口。而桃膠高纖同高蛋白質，加黑糖煮過食落爽口微甜，配搭討喜。
 

紫米茶鮮奶小芋圓（$32）

紫米茶帶天然紫色感覺特別夢幻，當中嘅花青素仲有抗氧化功能，紫米亦有助補血養氣、調整氣色，味道就係淡淡嘅米香。大部分食材都從由台灣直送，不過小芋圓就係香港製造，堅持無添加任何防腐劑或添加劑，口感軟糯煙韌。
 

薏仁鮮奶（$29）

薏仁有助美白祛水腫，小店更特別用大薏仁同小薏仁，因為坊間一般煲薏仁湯或者薏仁水都會用易熟嘅小薏仁，但其實功效嚟計大薏仁會比較好！所以佢哋會將大薏仁煮好再打碎，而小薏仁就保留粒粒口感，咁就既有咬口又有益啦。
 

紅豆茶露（$30）

台灣唔少女生都會飲紅豆水去濕，特別係祛下半身水腫！品牌選用台灣萬丹紅豆熬煮而唔係用即沖粉劑，飲起嚟甜甜哋無豆腥味。而配搭嘅茶露其實係黑木耳碎，比桃膠更爽脆，而且富含膳食纖維及微量元素，有「血管清道夫」之稱唷。
 

全部飲品唔單止無咖啡因，豆穀都係低温烘焙保留營養成分。飲品無任何化學添加劑，亦唔會用奶精，飲品加嘅都係鮮奶。所以要留意返擺室溫嘅話要兩個鐘之內飲完，放喺雪櫃亦最多可以擺三日咋。
 

植作茶
地址：尖沙咀山林道10-12號山林閣地下2B號舖

文：Cathy
相、片：Calvin Kwok