想食到日式家庭菜，唔使飛日本，搭去將軍澳就得喇！有間新開嘅日式料理，由日籍廚師主理，除咗主打嘅烏冬之外，仲有關東煮、丼飯、日式小食等都得食，同埋最緊要係價錢夠親民嘛，最平$30零蚊就有碗烏冬落肚啦。

餐牌菜式多樣化，淨係烏冬都有正宗日式湯鳥各、鍋燒烏冬、鐵板烏冬等選擇，全部都係用日本讚岐烏冬，煙韌彈牙。香濃蕃茄海鮮鍋燒烏冬用真茄肉製作，難怪蕃茄味道濃郁香甜，加埋海鮮嘅鮮味更香。鍋內有蝦、魷魚、貝類等、烏冬掛汁，蕃茄控必愛。

估唔到大阪燒都可以有烏冬版。呢個豚肉大阪燒鐵板炒烏冬，就用上大阪燒嘅醬料同配料，鐵板上熱度保持得好啲，醬汁亦惹味。

但講到最開心，可能係自選百搭烏冬，好似車仔麵咁，湯底同配料全部自己任揀，想點配都得，夠晒自由。5款湯底選擇包括鰹魚醬油湯、濃厚豚骨湯、咖喱湯、鮮香麻辣湯同香濃蕃茄湯，而配料更有成30樣揀呢，食得辣嘅持別推介麻辣肉醬，加埋落去好香口啊。另外壽喜燒牛肉、日本溫泉蛋、日本櫻花蝦等都唔錯。

關東煮係每次去親日本都會想食嘅嘢，咁耐冇去有冇心掛掛？喺度解下心癮先~ 用正宗鰹魚做成高湯，帶出微甜。同樣都係有多款配料揀，大根可以話係必揀，最索湯嘛；芝士竹輪都幾有驚喜，淡淡芝士香喺口中咇出嚟，其餘選擇有肉骨腸、炸豆腐魚丸、雞肉串、日本年糕等。

小食方面，大阪燒再進化！今次係串燒版，一串咁拎起嚟食，好方便。

俺流亭
地址：將軍澳常寧路2號TKO Gateway東翼1樓E139號舖

文、相、片：Kar