賣花讚花香乃人之常情，不過西環呢間新店夠膽喺門口寫住「踏嚐百家 泰國第一」咁架勢，就當然要由開飯仔嚟問個仔細！原來老闆真係定期去泰國取經，學到一身武功返嚟自己開店，由熬煮湯底到揀食材都一絲不苟。而家仲做緊新張優惠試食價，實行薄利多銷益街坊。
 

位於香港大學港鐵站附近嘅666泰船麵店如其名主打七款泰式船麵，由於船麵係一種喺泰國水上市場賣嘅小食，分量自然細得多。嚟到香港怕大家唔習慣，所以分量調整過，女士大概食兩碗就夠飽，男士就可以再食多一碗或者選擇嗌小食。
 

招牌豬肉船麵($20)主要材料有豬肉片、豬潤同腩肉，要特別一讃腩肉入味而有咬口，無坊間一般腩肉過腍嘅缺點。配埋店家秘製嘅香口脆脆同爽脆白通菜，口感層次豐富。麵底可以揀金邊粉、米粉、河粉、粉絲或者黃麵，五款都係特別從由泰國入口。
 

而另一推介係牛肉船麵($20)，主要材料有牛丸、肥牛同牛腩。略嫌肥牛片肥膏較多，不過牛丸口感彈牙，而且牛腩軟腍富牛肉香，補返數啦。
 

不過其實船麵靈魂在於湯底，呢間小店每晚只會準備兩大煲湯底隔日賣，皆因真係要落足時間心機去熬。老闆同開飯仔講，單係將要用到嘅草藥切碎再用唔同溫度炒製嘅準備功夫，都已經要用超過一個鐘！草藥中除咗甘草同八角等較為常見嘅之外，仲有兩款係香港搵唔到，需要特別喺泰國入口嘅神秘草藥。而呢碗深啡色相當濃稠嘅湯底係用咗係草藥再加豬骨、醬料、椰水等材料熬煮，所以飲落喺濃郁鹹香嘅味道當中，又帶淡淡嘅香料同草藥味。
 

除咗船麵之外，餐廳亦有飯、小食、串燒、湯同飲品供應。泰式海南雞飯($25)一樣係細分量。雞皮唔肥膩兼有少少爽韌，雞肉亦夠嫩滑有雞味。點埋師傅秘製嘅雞飯醬，入口先酸後辣，有香味又開胃。雞飯亦係加入香茅、薑、班蘭葉等香料，食落少一份油膩，多一份獨特誘人香氣。
 

老闆仲公開埋Secret Menu：其實仲有另一款醬汁，就係特別去泰國買返嚟，水門知名海南雞飯店廣興出產嘅雞肉飯醬！醬汁味道更辣，最啱無辣不歡，又或者掛住水門雞飯風味嘅你。
 

鐘意香口小食嘅話唔好錯過佢地嘅泰式炸蝦餅($30)，一份五件，件件手打咬落夠哂彈牙，皮香脆而厚度適中，絕對唔洗驚會食到成口粉。蝦餅本身已經有少少調味，點埋酸辣醬更加惹味香口。
 

食咗咁多香口嘢不如飲返個椰青($32)啦，原個椰青即叫即開，難得飲落唔酸之餘仲係自然清甜，飲完可以挖埋椰肉嚟食。原來亦係多得老闆試勻哂唔同供應商嘅椰青，最後搵到一間滿意嘅。
 

餐廳開業到而家已經得到唔少街坊同附近大學生嘅歡心，除咗因為有新張優惠夠抵食之外，亦因為食物有泰國特色。老闆亦表示希望先穩定出品，試業期間會繼續以優惠價吸引大家嚟試食賺口碑。穩定後將會推出更多食品，好似青咖喱麵、冬陰功湯、泰式甜品等等。暫時未知優惠期幾時會完，所以想試嘅話開飯仔當然係建議越快越好！

666泰船麵
西環德輔道西366號中亞大樓地舖
*文中所示價錢為訪問當日的新張優惠價，最後價錢以餐廳餐牌出示為準

文、相、片：Cathy