呢間京都抹茶品牌嘅蛋卷一向都好受歡迎，今年夏天佢地就推出三款全新口味，士多啤梨同芒果口味酸酸甜甜又有軟糯麻糬，黑糖蕨餅更加係坊間少有，買哂三件做飯後甜品都唔過分吖。
 

茶匠 清水一芳園之前出過嘅特濃六層抹茶卷反應唔錯，最近佢地去鑽石山荷里活廣場開新分店，乘勢全線推出三款新口味：芒果鮮忌廉蛋卷、士多啤梨鮮忌廉蛋卷同黑糖蕨餅忌廉蛋卷。
 

芒果鮮忌廉蛋卷用嘅係日本芒果，輕甜蛋糕包住加入鮮果肉嘅忌廉同芒果麻糬，食落香甜口感豐富。士多啤梨鮮忌廉蛋卷就會選用當造品種，同樣有果肉忌廉同麻糬，粉紅色相當吸睛之外味道天然，酸甜有致。雪糕食忌廉口感會有啲似雪糕，相當討喜。
 

而黑糖蕨餅忌廉蛋卷一拎上手就聞到黑糖甜香，唔單止蛋糕加入沖繩雪鹽制鹽所出產嘅黑糖，忌廉蛋卷裡面更包住一粒粒品牌自家製嘅黑糖蕨餅，配搭獨特甜而不膩。
 

舖頭仲有唔少日式甜品，全部都係香港工場每日新鮮製造，而且食譜跟足日本本店，希望大家食到同日本一樣嘅味道。負責人仲表示最近研究緊將京都店嘅得獎抹茶芭菲引入香港，計劃先推出抹茶軟雪糕同抹茶Latte等新品，抹茶控可以拭目以待！

茶匠 清水一芳園
新店地址：鑽石山龍蟠街3號荷里活廣場3樓320E中庭
營業時間：11:00 - 21:30

文、相、片：Cathy