Stephy新開茶飲店台灣回流期間限定聯乘Snoopy推棉花糖朱古力特飲

又有新嘅茶飲店啦~ 呢間喺銅鑼灣開業嘅台灣回流店，藝人鄧麗欣（Stephy）係老闆之一，主力提供健康嘅天然台式茶飲，更有加入香港少見嘅白木耳。同時，同Snoopy聯乘合作，推出一系列特飲同精品，各路粉絲要集合啦。

「我哋都鍾意去旅行，又鍾意茶飲，所以就希望做一間又好飲又健康，又好玩嘅茶飲店。」呢個品牌由Stephy同兩個朋友一齊創立，兩年前首先喺台灣開設第一間舖頭，跟住開到美國、加拿大、馬來西亞等地，而家終於都開返嚟香港。「我地都考慮同計劃咗好耐，終於都可以實現，好開心可以喺自己地方有自己嘅品牌；加上我哋都好掛住自己嘅飲品，而家未飛得去台灣，就要喺香港有自己舖先可以飲到自己嘅飲品啊。」Stephy表示每間舖頭嘅飲品雖然都係大同小異，但裝修就各有特色，希望可以帶到多啲新鮮感同打卡點畀大家。好似今次銅鑼灣呢間，就以Snoopy為主題啦，有成幢Snoopy牆身，fans要去報到啦。