面對住攻擊力特強嘅日本甜品，人類，特別係甜品控嘅防禦力即刻迅速下降，然後好快就投降，繼續貫徹「食咗先算」嘅態度。就好似呢間已經喺香港有幾間分店嘅日本餅店咁，一見到佢哋話有隻全球首賣嘅手卷，又會好想試下。

呢間主打日式卷蛋糕嘅餅店，選用由日本直送，自家製北海道產牛乳忌廉去製作每件糕點。新店會推出3款全球首賣嘅堂島手卷，分別係芝士味香濃嘅幸福の味堂島手卷、咖啡凍堂島手卷，同配埋士多啤梨、白桃、芒果等夏日生果嘅水果堂島手卷。

叫得做手卷，因為佢嘅size比佢哋平時嘅卷蛋糕細好多，方便OL拎住一路行一路食呀。

至於白桃乳酪堂島卷係期間限定嘅cake，甜甜嘅白桃加埋輕盈嘅乳酪忌廉，唔會太膩呀。而同日本同步推出嘅就仲有皇室紅茶堂島卷同蜂蜜檸檬堂島卷。紅茶嗰隻，茶味幾香濃，仲可以食得到粒粒茶葉添。

熱辣辣嘅夏天又點少得雪糕吖？抹茶味啱唔啱？香港限定㗎，日本都冇！軟軟滑滑咁，微甜。

餅店仲引入埋3款雪糕芭菲杯，雪糕可以揀抹茶或者牛乳味，而底層嘅配搭就有抹茶、tiramisu同芒果味揀。

Patisserie Mon cher
地點： 中環擺花街25號中環大廈地下
開幕日期： 2017年6月30日  10:00am

文、相：Kar