食一人一鍋未必要去快餐店架，近年興起一人一鍋熱潮，貪佢可以選擇自己鍾意嘅口味。西營盤最近就有一間新日式餐廳進駐，供應海鮮一人一鍋及日式定食、小食，而且湯底都好特別～

札榥黑芝麻担担湯

湯底方面就有五款選擇，有壽喜燒、麻辣雞湯同京都豆腐蕃茄湯等。較特別就有呢個札榥黑芝麻担担湯，呢個湯底靈感來自川菜，大廚親自炒香黑芝麻後再拎去磨，再加入日本豉油、花生醬同各款香料，未食已經有陣陣香氣，食落就又香濃又麻，平時偏向濃郁口味嘅人就啱哂！

北海道牛乳魚湯

清淡少少可以試下呢個牛乳魚湯，每日用新鮮𩶘魚同鰹魚熬製，味道鮮香，帶有淡淡牛乳味。

八坂盛海鮮(時令)火鍋二人餐($628)

呢個海鮮火鍋二人餐就係抵食之選啦！包括沙律、小食、兩個鍋、海鮮拼盤、牛及豬、鮮雞件同丸類等。海鮮盤有時令龍蝦、鮑魚、北海道扇貝、廣島蠔、本地花蟹、蕃薯蜆、鮮蝦同魚，全部都係即日新鮮去買，所以上枱果陣仲好生猛。

肉類就包USDA Prime牛肉、上級豬梅片同埋鮮雞件，牛味香濃～另外要試下自家製嘅手打墨魚滑，食到一粒粒墨魚得嚟仲夠彈牙。私心推介佢地個辣椒油，食落香得嚟唔太辣，點肉類同海鮮都好合適。驚唔飽仲有讚岐烏冬、拉麵同飯打底啊～

黃金軟殼蟹($68)、八坂黃金蝦($82)、關西松露手打炸丸($72)

日式小食都有返咁上下水準，軟殼蟹有濃郁鹹蛋味，炸到脆卜卜連殼都可以食埋，黃金蝦有鹹蛋香之餘仲帶有甜味，食落無咁膩，松露手打炸丸都幾彈下，而且松露味都幾重。

鐵板安格斯牛柳粒拼吉列蝦定食($88)、鐵板漢堡扒拼南瓜餅定食($88)

如果唔想Shabu Shabu，都有日式定食架，定食就包一個沙律、湯、主菜同白飯。而且都好多選擇，鐵板安格斯牛柳粒拼吉列蝦定食，用咗安格斯牛柳，肉質好軟腍，另外鐵板漢堡扒拼南瓜餅定食，漢堡扒仍然充滿肉汁。

八坂   

地址: 西環西營盤第三街133號豐盛大廈地下B號舖

文: Yanica

相、片: Tom Li