食放題最驚就係食得開心嘅時候比人叫交枱，灣仔呢間放題店就無呢個煩惱啦！重新裝修後改為半自助形式，晚市四個鐘內可以任食自助吧刺身、壽司、串燒同埋其他超過30款嘅食物，全部都係即叫即整，夠哂新鮮，最重要係可以一路傾計一路慢慢食～
自助吧當然有食放題唔少得嘅刺身同壽司，刺身全部厚切，好新鮮。壽司都有好多選擇，如甘海老同北海道帆立貝，連貴價日本北海道海膽都有、而且味道甘甜無腥味，特別啲有鵝肝壽司，入口即溶，充滿油香。
串燒部都有好多新食物，熊本和牛串質感軟唸，華味雞嚟自日本博多，雞味濃而且會瘦啲，加埋調味食好惹味！另外仲有燒羊架、帆立貝同香草豬肉腸等新選擇。
鐘意食魚類就要試下燒三文魚鮫同池魚一夜干，兩款個皮都燒到卜卜脆，前者三文魚油香重，後者就魚味濃啲，不過三文魚鮫每日限定得10份，想食就要早啲叫啦！
天婦羅都大把你揀，有海蝦天婦羅、蕃薯天婦羅、南瓜天婦羅同特別啲嘅秋葵天婦羅，粉漿好簿，唔會一咬落去就成口油。
甜品方面有10款，都係一啲日本大熱嘅水信玄餅、抹茶蕨餅、日本白桃雪糕同梅酒啫喱，除咗甜品櫃，仲有即製焦糖燉蛋同水果pancake。飲品方面就有日本梅酒、啤酒、台式茶飲同汽水等。
食放題就當然要食下海鮮啦，只要打卡的話，就會跟人頭送返一份海鮮拼盤，包括愛爾蘭生蠔、加拿大翡翠螺、加拿大藍青口同泰國熟蝦！
放題逢星期日至四定價就$328（小童及長者$188），而星期五、六、公眾假期及前夕則就港幣$348元（小童及長者$208）。午市都好抵食，溫泉蛋牛肉丼同浪人角切刺身丼都係$50蚊，喺灣仔區嚟講真係好抵食架啦！
地址: 灣仔駱克道181號京城大廈商場2樓
文、相、片：Yanica