食牛多過食飯嘅牛魔王，對牛肉嘅要求suppose係愈嚟愈高，唔係靚牛都唔放入口（好似係）。旺角最近新開嘅一間日式燒肉店，直接將唔同地方嘅牧場原隻和牛直送到港，頭炮選用嘅係MBS達M9+最高級別嘅100%全血純種澳洲和牛，應該都可以滿足到一眾牛魔王啩。

呢種M9+100%全血純種澳洲和牛相當矜貴同罕有，除咗因為最少都要用4年幾時間飼養外，仲要對上4代都係由100%公牛、母牛配種先至合規格，暫時全港亦只係得呢間燒肉餐廳用呢種和牛。同日本和牛相比，澳洲全血和牛肉味更濃，營養價值亦較高，鐵質較豐富，雪花含大量不飽和脂肪酸。

由於係原隻和牛直接送到餐廳嘅關係，牛嘅部位選擇當然亦較多。識食一定食純種和牛拼盤，一次過可以食到9個部位，包括脂肪比例平均，肉味濃郁嘅牛三角、紐約客（西冷）、牛板腱、牛舌、彈牙有嚼勁嘅牛胸、橫隔膜，較有嚼口嘅牛後腿肉、牛𦟌同埋牛腰脊肉、牛舌。

原條牛舌同樣吸引！幻切和牛舌經剝皮、去筋、切去太韌同硬嘅部位後，加上鹽麴作調味，肉質爽口，油脂好香。不過燒嗰陣就要格外留神啦，迫出太多油脂嘅關係，好易燒燶。

當然，各位食得刁鑽嘅牛魔王，亦可以自行揀選想食嘅牛肉部位，再由大廚即時切割同處理。

除咗和牛燒肉料理，餐廳亦有多款和牛菜式提供，好似慢煮牛肉丼、和牛拉麵等，同樣都係用100%全血純種M9+澳洲和牛製作。慢煮和牛丼用西冷部分進行慢煮，食落肉質鬆軟，而米飯同丸十其他餐廳一樣，都係使用當店精米，口感煙韌帶有米香。篤穿埋頂頭隻溫泉蛋，蛋汁慢慢滲入牛肉同啲飯度，層次再提昇。

至於和牛拉麵，則使用和牛肉眼部位，牛味香濃。湯底同和牛骨、牛筋、木魚、海帶等熬製8個鐘，而且仲上菜後先至喺客人面前淋入碗內，一嚟令牛肉保持喺最滑嘅狀態，二嚟亦可吸收到牛肉釋放出嚟嘅肉汁，加重清湯嘅牛肉香味。

雖然餐廳以和牛做主打，但都有啲非和牛菜式嘅，好似呢個幸福摩天輪咁，就有5種唔同嘅炸物小食，包括廣島蠔唐揚、炸薯角、炸雞肉、炸魷魚圈、炸雞軟骨，轉下食下咁幾開心。

食完成餐點可以冇甜品？嗌返個芭菲先啱數，其中士多啤梨味呢款，有三球士多啤梨雪糕，仲有士多啤梨果肉同果醬~

丸十あぶり牧場
地址：旺角太子道西192號旺角新世紀廣場3樓342D舖

文、相、片：Kar