針對疫情嘅政策一步步取消，但餐廳結業潮則好似未見底咁，持續有新一代人氣店舖、老字號同大家講再見。唔想錯過留下遺憾，而家先把握時間去回味，期望有日可以再相見。
大圍窩夫咖啡店 夏雪
最後營業日：6月28日
小店樓高兩層，主打即叫即製嘅窩夫，外脆內軟、再加麻糬嘅話真係無得輸！而且有京都抹茶、紫薯、威士忌咖啡等唔同口味，亦可以做成All Day Breakfast等鹹食。另一推介係佢哋嘅Tiramisu，咖啡香同酒香都好出～可惜店家日前宣佈將於6月28日後約滿結業，之後要回味佢哋嘅窩夫、Tiramisu同咖啡，就要去中環嘅姊妹店喇。
圖：長沙灣韓式打卡Cafe 우리 Wuli
最後營業日：6月30日
21年喺長沙灣開張嘅韓式Cafe，奶油色系好啱打卡，店名우리係韓文「我們」咁解，希望成為大家傾計談心嘅地方，同時亦可以拉近餐廳同食客嘅距離。食物、飲品都有特色，全日韓國早餐加入辣醬烤年糕、泡菜雞蛋捲等韓國菜嘅元素，Pancake做成波波鬆餅造型，Crazy Chocolate更係有滿滿嘅忌廉同朱古力醬！更不時推出時令或者期間限定Menu，保持新鮮感。
現已結業
老字號粵式麵店 珍苑麵家
最後營業日：2月28日
上水呢間屹立50年嘅粵式麵店，最後營業日由3月12日提前至2月28日！佢哋嘅鮮蝦雲吞、鳳城水餃、柱侯牛腩都備受街坊歡迎，可惜老闆表示太太身體抱恙，加上難請人而選擇光榮結業。雖然麵店曾經喺2014年結業，2015年重開，但有冇機會二度重開真係未知之數，要懷念呢種由細食到大味道嘅街坊，就把握最後機會喇～
圖：老字號腸粉+煲仔飯名店 陳漢記
最後營業日：3月15日
呢間喺大埔墟開業多年嘅粥麵店，最出名嘅係玻璃腸粉，因為腸粉又薄又透可以睇到啲餡而得名，而且入口有米香。另一招牌係煲仔飯，即叫即做熱辣辣。雖然有街坊指水準每況愈下，但因為佢開到凌晨四點，依然有唔少人會去食宵夜。餐廳日前公佈營業至15/3就會光榮結業，要回味要趁早。
圖：cwong823
老字號馳名燒鵝+粥品 富記粥品
最後營業日：3月24日
旺角呢間粥店由街邊攤檔、到先後喺上海街、花園街入舖，已經有逾50年歷史。佢嘅廣東生滾粥，如及第粥、魚腩粥都好足料；另外惹味嘅招牌燒鵝、乾炒牛河都係人氣款式之一。加上營業時間長，由早上7:30開到夜晚11:30，係唔少人心目中嘅一人飯堂，或外賣加料嘅選擇。
圖：人氣芋泥吐司店 uen cafeteria
最後營業日：3月25日
呢間小店由網店起家，一開始賣芋圓，同大家熱捧嘅芋泥吐司、芋泥鮮奶，再到之後推出嘅期間限定水果三文治都大獲好評～因為兩位店主落足心思，好似芋泥選用台灣當造嘅芋頭品種，每日新鮮製作，軟綿得嚟又保留部分顆粒，更有咬口。軟殼蟹配蟹柳沙律吐司大大份而且好多菜，好味得嚟又健康啲。但小店日前宣佈因太古鋪位租約期滿，只會營業至25/3，未來唔知會唔會再開舖。
傳統養生糖水 養生糊甜品專門店
最後營業日：3月31日
炮台山呢間養生糖水舖由兩夫婦經營，主打嘅足料養生糖水標榜人手炒香食材、以石磨研磨、低糖且每日新鮮製作。其中充滿舊時味道嘅芝麻糊、合桃露、腰果糊係人氣款式，另有蛋白杏仁露、腐竹薏米蛋、桑寄生蓮子蛋茶等選擇，想特別啲可以配埋芋圓𠻹。加上小店營業至11pm，係附近街坊嘅心水宵夜之一。
圖：店舖(IG)、nutty_eater
人氣多元化港式餐廳 開餐
最後營業日：3月31日
呢間餐廳嘅菜式多元化，集合本地各種受歡迎嘅款式，包括招牌溫泉蛋雞扒鮮茄湯通粉、招牌酸菜魚片湯河、原條鰻魚雞扒飯、健康茶飲等，總有一款啱你口味，而且價錢都算抵食，做一人飯堂都唔錯。不過因為租約問題，最後一間佐敦分店將於3月31日結業，想作最後支持要把握時間喇～
圖：創意雞蛋仔 潮食
最後營業日：暫定3月下旬
平時講豬柳蛋，你可能會諗起漢堡包，但對呢間小食店嚟講，係佢哋打響名堂嘅雞蛋仔口味！豬柳蛋雞蛋仔以豬柳粒、雞蛋同芝士做餡料，食落鹹香有咬口；另有蘋果肉桂、Pizza、抹茶黑芝麻等口味。不過小店宣佈租約到期不獲續租，暫定做到3月下旬。而家店主努力搵緊新舖位，希望早日同大家再見。
圖：老字號腸粉店 明記腸粉
最後營業日：4月9日
上水又一名物即將同大家講再見…明記腸粉開業近三十年，由樓梯檔做起，現時仍保持用老式搪瓷碟同油紙墊住食腸粉，充滿懷舊風味。佢嘅「三色招牌」包括豬皮、魚蛋同腸粉，食客可以喺自助區按個人喜好混醬𠻹，配份豉油皇炒麵、皮蛋鹹蛋瘦肉粥又可以做一餐。食品$12起就食到，定價親民，一直受附近嘅學生、街坊歡迎。
圖：文具主題Cafe TOOLSS
最後營業日：4月16日
石硤尾呢間Cafe兼賣特色文具，加上木系裝修好有文青feel，開業8年吸引唔少人嚟打卡，就連電視劇《打天下》亦曾經喺度取景！Cafe供應一系列西日食品，如日式咖喱牛肋肉飯、羅勒醬蟹肉意粉等。店主最近表示：「累了」，宣佈4月結業，亦未決定會否重開，趁重有個幾月時間去同小店道別啦。
圖：銅鑼灣最強Tiramisu The Coffeeology
最後營業日：4月23日
銅鑼灣呢間工業風裝修Cafe一直都好受歡迎，佢哋嘅Tiramisu更靠住柔滑嘅口感，被唔少Foodie封為香港最強Tiramisu之一。除咗原味，更不時推出開心果、Earl Grey Lemon等創新口味。Cheesecake亦好受歡迎，長青抹茶口味之外，好彩更會食到黑芝麻、南瓜等期間限定。但小店日前宣佈由於租約完結，但無礙佢哋鍾意試新嘢嘅精神，繼續推出新產品：甘酒抹茶Tiramisu！
圖：親民西式甜品店 Aroma Dessert Cafe
最後營業日：5月1日
荃灣呢間甜品店開業7年，依然有唔少街坊熟客支持，皆因甜品選擇多，而且平均水準都唔錯。最多人食嘅係厚Pancake系列，雖然無梳乎厘Pancake咁入口即溶，但脹卜卜又夠鬆軟，配雪糕食好滿足嘅呢！窩夫、心太軟、芭菲都值得一試，而且定價合理。可惜老闆決定轉行，同老闆娘一齊開蛋糕甜品教室，想繼續支持嘅可以留意佢哋公佈詳情啊。
圖：石門拉麵小店 麵道
最後營業日：5月31日
沙田石門呢間小店主打日本京都風拉麵，蜆貝醬汁湯拉麵同伊勢海老豚骨湯拉麵都有唔少捧場客，前者用蜆貝配搭醬油同黑松露帶出鮮味，後者龍蝦香氣濃郁。不過最受歡迎嘅通常係期間限定拉麵！好似最近嘅極上牡蠣雞清湯拉麵，同之前嘅芝士豚骨雞白湯拉麵。可惜小店最近宣佈因租約期滿而要結業，最後倒數前依然推出新優惠：DSE考生憑准考證，星期一至五即可享全單9折！
圖：
文: Cathy.C、Cathy.H
最後更新日：2023年6月6日
