推倒美食沙漠之名！馬鞍山恆安宵夜小食街

各位馬友們，唔使成日呻話馬鞍山係美食沙漠啦！啱啱裝修後開幕嘅恆安市場新增一條食街，除咗常見嘅港式美食之外，仲有藥膳雞米粉、日式串燒、蛇羹、德國燒豬手等等，勁多選擇，而且收得晏，最夜開到凌晨兩點鐘，你哋仲有乜投訴？仲唔快啲睇睇有乜必食items先啦！

日系多汁串燒舌尖回味

走日本風味小食為主，如日式炸物、茶漬飯、烏冬等等，每晚6點起仲有串燒，包括常見嘅雞牛豬，仲有多春風、虎蝦、三文魚扒，甚至原條鰻魚添，即燒即食，再塗上自家調配嘅沙爹醬，夠晒滋味！

燒原隻八爪魚，大大隻，口感好彈牙，1件都夠晒飽！

另有汁燒鰻魚飯，有來自日本嘅鰻魚再配以自調鰻魚汁、雞蛋絲及珍珠米飯而成，鰻魚肉質厚身，亦見鮮美。價錢為$48。

至於炸物方面，推介南瓜薯餅及野菜薯餅，外脆內軟，用作tea time小食就最啱，價錢約$8-$10/件。

新鮮手打魚肉燒賣三寶皇

燒賣入面嘅魚肉，每日都新鮮手打，所以，而且每日由人手即包即蒸，夠晒新鮮。開舖第一日，就已經賣咗廿幾籠、即大約3,000粒燒賣，勢頭超勁！價錢為$12/8粒。

口感的確比起一般嘅有嚼頭，的確好食，難怪店員經常都密密包燒賣啦！

除此之外，另外常見港式小食如煎釀三寶、生菜魚肉、炸雞翼、炸雞髀等等。

必試蛇羹藥膳米粉自家工房

市場之中，呢間嘅出品都算與眾不同，舖頭有3樣鎮店之寶：蛇羹、藥膳雞米粉、膏蟹糯米飯。冬天食蛇羹可行氣活血，令身體暖笠笠。蛇羹配料有：蛇肉、雞肉、木耳、花膠、冬菇、薑絲等配料，好豐富。臨食之前，仲可以加少少薄脆及檸檬葉，口感更豐富。價錢為$38/小、$48/大。

而開飯仔就好鍾意另一款自家藥膳雞米粉($38)，藥膳湯底係以黨參、北芪、圓肉、杞子等藥材熬煮超過6個鐘頭，清心潤肺，配以脂肪不多嘅雞肉及掛湯米粉，都幾yummy。而且佢仲有個貼心位，外賣嘅話仲會湯、米分開，用嚟做lunch都係一個唔錯嘅選擇。

大胃王必試3倍鐵板燒餅鐵板工房

主打日式鐵板小食如炒麵、燒餅等，開飯仔就品嚐咗3倍鐵板燒餅($40)，做法有少少似大阪燒，將粉漿預先調較好，然後倒喺鐵板上，再加入火腿、芝士、燒汁、沙律醬等配料。平日食嘅大阪燒，半個都已經好飽滯，呢個燒餅不太感膩，口感煙韌得嚟又唔太厚身，抵讚！

7款口味任你揀皇后餃子

採訪當日所見，舖頭經常大排長龍，好受食客歡迎。梗係啦，舖頭嘅特色就係多！選！擇！餃子口味除咗固定搭配鮮肉，另可選韭菜、椰菜、芝士玉米、芫茜、泡菜、白菜及香菇芹菜7款配菜，而且煮法都可以揀選煎、炸、蒸、湯。怕唔夠飽嘅話仲可以跟碗麵，好方便，相信嚟緊會係區內學生經常幫襯嘅飯堂。枱面仲有辣菜脯、泰式辣醬畀客人任加架！