小儀開設嘅車仔麵店日前開到去將軍澳，地方更大亦帶嚟更多特色車仔餸，好似「惹火」嘅麻辣蓮藕，口感好得意嘅脆卜卜酸齋等，即睇小儀自己介紹啦！
 

麵麵店最近喺將軍澳新都城中心開分店，「街坊廚神」小儀依然係店長兼股東之一。除咗原店嘅店主同拍檔之外，今次仲特別同美心集團合作營運，小儀話多方面都進步咗，好似有團隊幫手將麵麵店嘅原味道系統化地記錄同監控，之後無論開幾多分店都可以食到呢個地道風味。
 

麻辣蓮藕

新店籌備接近一年，車仔餸選擇亦會比太古城店多。麻辣蓮藕就係小儀推介嘅車仔餸之一，皆因小儀自己鍾意食口感爽脆嘅蓮藕，配搭品牌秘製麻辣醬汁，辣味「惹火」得嚟唔嗆喉，重口味人士必點。
 

脆卜卜酸齋

而酸齋就係從其他車仔麵店偷師，發現酸齋同車仔麵意外地夾，然後就同原店師傅研究獨家秘方，比一般酸齋更有咬口，希望大家食到嘅酸齋味道同口感都似中式咕嚕肉！咁就可以喺食鹹嘅車仔麵當中做到一個平衡嘅作用。
 

沙葛餃

坊間比較少見嘅餃子口味，餡料用咗沙葛混合豬肉粒，令柔軟嘅餃子多咗一重清脆嘅口感，味道清甜。
 

豉油皇雞翼尖

秘製醬汁味道比一般鹵水甜，雞翼尖煮至入味，小儀都話平時喺出面好少食雞翼尖，但麵麵店自家出品嘅雞翼尖就會連骨都食埋！
 

秘製鎮店菜脯

問到小儀如果森美嚟到會推介佢食咩，小儀好快就答話係菜脯！店家花咗唔少心思去研發呢個菜脯，辣味嚟自大量蒜蓉同辣椒。菜脯爽口之餘又唔會太乾，加到車仔麵當中唔單止更辣更惹味，亦更加口感層次。
 

 

推介配搭1：麻辣蓮藕、酸齋、沙葛餃、豉油皇雞翼尖、咖喱魚蛋

推介配搭2：酸齋、沙葛餃、豉油皇雞翼尖、豬皮、蘿蔔

店家整理咗兩個車仔麵配搭推介，配搭1有齊小儀最愛嘅幾款惹味香辣車仔餸，配搭2就啱晒怕啦嘅朋友。而且唔單止車仔餸有多款配搭，湯底除咗清湯，仲有少見嘅窩心薑酒湯，同全素嘅香菇素湯呀。
 

開張當日有唔少明星嚟支持，好似森美、吳日言、細So、Marco等

麵麵店
地址：將軍澳貿業路8號新都城中心一期2樓241, 250-251號舖

文：Cathy
相、片：Tom Li