台灣珍珠奶茶始祖，香港首間概念店登陸觀塘！招牌珍珠奶茶用黃金比例調配，每杯都要經過檢定。而且唔單止可以坐低飲台式茶飲，仲有台式麵食、便當、小食等，最受觸目嘅就要數到香港限定嘅甜品系列！
 

春水堂人文茶館係春水堂繼西九站之後第二間香港分店，亦係首間人文茶館概念店，同外賣店唔同嘅除咗提供堂食座位，亦多咗唔同台式料理，好似港人熟悉嘅牛肉麵、魯肉飯、滷味等等。新店約90%食材嚟自台中總部，有台中師傅留港一個月做監督，香港員工亦特別飛到台中受訓一個月，要考試及格先可以成為正式員工，保證大家品嘗到同台灣店一樣嘅味道。
 

正宗台式茶飲

珍珠鐵觀音奶茶（堂食$34 外帶$31）

叫得台灣珍珠奶茶始祖，嚟到當然唔少得要嗌返杯珍珠奶茶。比起用斯里蘭卡錫蘭紅茶嘅珍珠奶茶（堂食$30 外帶$27），呢杯改用鐵觀音做茶底嘅更受香港人歡迎！珍珠嘅大細同做法都跟足元祖做法，選用天然樹薯粉同用朱古力粉上色，無添加焦糖色素或防腐劑，從台中低溫送到香港後煮兩個鐘，至粒粒分明，外表光滑咬落煙韌Q彈。
 

而佢地珍珠奶茶另一特別之處係堅持黃金比例，每杯都要用儀器檢測糖度同濃度，所以製作需時。原材料同沖調方法當然亦相當考究，精選台灣頂級蔗糖，用Shaker搖茶以搖出約1cm厚、雪白幼細嘅泡沫，更能夠發揮奶茶清香。奶茶口感柔滑，鐵觀音幽香同蔗糖甜味平衡。
 

愛玉檸檬綠茶（堂食$34 外帶$31）

台式飲品當然仲有唔少口味選擇，愛玉凍同檸檬原汁同樣嚟自台中，入口唔單止有檸檬嘅酸爽，仲帶少少澀味，配茉莉綠茶令餘韻更加清新醒神。愛玉凍口感滑溜，個人覺得如果愛玉凍分量再多啲會更有咬口。
 

白毫烏龍（只供堂食 $55）

如果你鍾意飲茶嘅原味，就可以點佢地嘅文人茶系列，四款茶葉都嚟自台灣。白毫烏龍又名東方美人，以手工採摘一心二葉嫩芽，當中以夏天採摘嘅品質最好，茶湯橙紅清澈，帶獨特嘅桂圓蜜香，回甘輕但悠長。
 

文人茶上枱後先品嘗倒喺細杯當中嘅茶湯，之後就可以倒玻璃壺當中嘅茶，玻璃壺中嘅茶都飲完就先將茶壺當中嘅茶倒落玻璃壺，然後可以請店員回沖。先倒落玻璃壺嘅原因一嚟係稍微降低茶湯溫度更易入口，二嚟可以更容易控制濃淡，三嚟無咁重容易啲倒吖嘛。白毫烏龍可以回沖2-3次，最啱同一樣愛茶嘅朋友一齊慢慢享用。
 

 
香港限定甜品

珍珠熔岩蛋糕（$58）

知道香港人鍾意食甜品，觀塘店特別準備咗四款香港限定甜品，呢件熔岩蛋糕賣相最搶眼，鬆軟嘅鐵觀音蛋糕配濃郁豐厚嘅忌廉、黑糖漿同珍珠，甜而不膩。
 

珍珠招牌紅茶雪糕吐司（$58）

法式吐司上面加上紅茶雪糕、忌廉、黑糖漿同珍珠。雪糕紅茶香味濃郁不過有少少碎冰，忌廉柔滑輕盈，而法式吐司帶微微蛋香，脆邊位點雪糕同忌廉一齊食最好味！加埋珍珠口感層次豐富。
 

台式料理介紹

功夫麵（$53）

台式美食有多款選擇，功夫麵其名由來好簡單：因為要花好多功夫！肉燥選用豬後腿肉，加上香菇每日炒製，香氣十足。麵條粗幼適中，掛到醬汁之餘口感柔韌。
 

金沙芋泥丸（$48）

用手工芋泥包住鹹蛋流沙餡再炸，芋泥微甜軟綿、鹹蛋鹹香帶沙沙口感，加埋原來又幾夾，鹹甜有致而且無油膩感。
 

招牌滷味豆干米血糕（$48）

甚有台灣夜市感覺，滷味醬汁香辣惹味，米血糕軟糯入味，而豆干就略嫌口感唔夠Q。
 

春水堂人文茶館
地址：觀塘觀塘道418號創紀之城五期apm一樓L1-1號舖

文、相：Cathy