今年潮流興起食石燒牛，近半年已經有多間石燒牛店開業，最新開喺油麻地嘅一間，RubberBand成員阿偉都係老闆之一。
牛魔王一街都係，普通嘅牛肉已經滿足唔到牛魔王嘅需要，可以自己落手落腳燒，控制牛肉生熟度嘅石燒牛，就成為一眾魔王嘅新歡喇。呢間石燒牛扒專門店，主打嘅當然就係牛扒啦，先由師傅用岩鹽板將牛燒至一成熟，令到喜馬拉雅山岩鹽滲入肉中，簡簡單單已為牛肉做好調味，再送到客人面前，等佢哋自己燒。
至於牛肉嘅選擇，嚟自日本、澳洲、美國等唔同地方嘅都有，「我哋呢度賣嘅牛肉由價錢相宜到貴價嘅都有，最平係$80嘅美國超貨牛肉，冰鮮到港。如果比較貴啲係嚟自鹿兒島嘅A5和牛，我哋大約賣二百零蚊嘅價錢，同喺超巿買都差唔多。」
阿偉個人最推介呢，就係鹿兒島嘅A5和牛喇，油脂比例同雪花都好平均，食落仲帶有甜香。
神石美國牛扒唔使燒太耐，已經可以做到邊位微脆嘅效果，而且肉質軟腍。
至於想有啲嚼勁嘅話，就可以揀美國牛腰窩扒。
澳洲M6黑毛和牛則有好香嘅肉汁。
而大家食嘅部位愈食愈刁轉， 餐廳提供IBP牛膈肌，即係橫膈膜嘅位置，肉質又幾爽嫩。
當然唔少得肉味濃郁嘅安格斯西冷。
牛肉當然係重點，但餐廳特別調製嘅神石燒汁亦係神來之筆。燒汁以頂級牛肉烹調，再加入蒜片、芝麻、蔥花等，除咗有淡淡牛肉香外，點牛肉食亦令牛肉變得更鮮甜。
餐廳另外設有自助放題吧，沙律、麵豉湯同秋田珍珠米都係任裝唔嬲㗎。
神石焼きビーフステーキ專門店
地址：油麻地碧街35號地舖
文：Kar
相、片：Tom Li
