平時食串燒多數都係食日式，但fusion串燒又食過未？大坑最近新開咗一間日式fusion小店，店舖細細座位大約幾十個。除咗串燒外，有多款創新小食，好似加咗泡菜醬嘅秘製豬手同燒西班牙伊利丹黑毛豬等等。

新店開咗一個月多，負責人話其實佢地以前都係做開日式傳統餐廳，但希望可以迎合唔同人口味同有多啲新鮮感，所以就決定嘗試下日式fusion串燒同小食～

免治羊肉棒($48)

平時多數都係雞肉棒，店主話想特別啲所以就試下用羊肉，估唔到效果又唔錯。羊夠騷，鐘意食羊就啱哂，加埋自製嘅燒汁同日本德島蛋黃食就更滑！

燒豚肉腩($24)、燒雞翼($38)、燒牛脷($38)

串燒建議揀鹽燒，只會加鹽同黑椒調味，咁先可以保留返肉味。

燒秋葵($28)

秋葵唔係個個鐘意食，但燒完嘅秋葵卜卜脆，較平時易入口，加埋燒汁食又唔錯！

西班牙伊利丹黑毛豬($108)

特意揀西班牙黑毛豬，而且確保每份都一定有8安士重。靚嘅西班牙黑毛豬肉味較重，而且唔駛燒到全熟都食得，燒完仲有微微粉紅色。肥嘅部份食落脆口，質地軟腍，好惹味，好似韓式咁包埋生菜食就無咁漏！

秘製豬手($48)

店主先將豬手飛水去油，再加酒、味醂同韓式泡菜醬煮至入味，食落惹味得嚟又唔太辣。店主話整呢款豬手其實都經歷過好多次失敗，例如試過咖哩去煮，但出嚟效果就麻麻。

高野豆腐($48)

豆腐係得日本先買到，質地好似一舊海綿咁，要先將佢浸15分鐘，再榨乾然後拎去炸，炸完就放入木魚湯入面煮，食嘅時候吸哂湯嘅味道，味道甜甜地，係必食之選！

店內嘅串燒同煮物好多都二十至四十蚊就有交易，喺港島區嚟講，都係一個唔錯嘅選擇！

角川

地址: 大坑京街5號地舖

文、相、片：Yanica