咖啡迷應該好忙啦,上月有Wine & Dine咖啡園、咖啡市集,最近仲有唔少新café喺港九新界登場,真係試極都唔完!好似呢間位於尖沙咀嘅Page Common,同樣備受矚目,由咖啡界著名品牌Ideaology主理,由環境、設備、咖啡豆都相當高質。
Café位於未正式開業嘅Hip hotel Page148地下酒店大堂,空間感十足,咖啡吧則係check-in位置,入到來完全唔似酒店!以home of urban explorers為主題,而咖啡就係發掘嘅重要元素之一。環境以簡約工業風設計,線條清晰利落,有大張共用餐桌,客人嘆啡之餘亦可交流互動。
咖啡吧有最嶄新嘅咖啡機MODBAR,只見銀色流線型咖啡頭,機身隱藏喺枱底,令客人可以睇到咖啡師沖咖啡。House blend由Ideology主腦Chester Tam調配,選用兩款非洲及印尼咖啡豆,以中度烘焙拼配而成,容易入口之餘,香氣、味道及aftertaste都相當平衡,飲落口感乾淨舒服,黑咖啡帶有果酸花香,做意式奶啡就帶朱古力味。
手沖就有四款不同風格的單品咖啡,每次少量供應再轉換。採訪當日有秘魯、非洲等產地,用日本名牌KINTO滴濾器, 啞黑色及金屬外型型格之餘,沖出來的咖啡亦純淨,突出咖啡豆本身的風味。
手沖咖啡 $65
更多新店直擊: |
食物方面以輕食為主,多士有多款口味選擇,選用Bread Elements出品的酸種麵品製作。鹹食必吃港式鹹牛肉炒蛋多士,炒蛋夠滑。另一款無花果帕爾馬芝士多士就較西式,芝士配上新鮮無花果及橙蜜,配搭好特別,味道鹹鹹甜甜,麵包內亦有無花果及合核,口感同味道都好夾!
港式鹹牛肉炒蛋多士 $55
無花果帕爾馬芝士多士 $75
人見人愛當然唔少得牛油果多士,牛油果份量足,而且特別加入青檸汁同青檸皮,香氣同味道有多一個層次,食落更加清新。
牛油果多士 $68
健康選擇可以揀希臘乳酪杯,甜品就唔少得自家製Tiramisu,做法係傳統濕潤口感,以espresso代替酒,咖啡味濃郁甘香,比坊間唔少甜品店做得更好。
鮮果乳酪香脆燕麥片 $42
提拉米蘇 $48
地址:尖沙咀柯士甸道148號Page 148地舖
文:Perrins
相、片:Tom Li