銅鑼灣又新開一間茶飲啦～呢間茶飲店由90後女生Coey開設，Coey自細就對茶飲情有獨鐘，經過三年嘅鑽研，終於搵到一個最合自己心意嘅配方。
店舖嘅飲品有兩個獨特之處，首先就係核心茶底，所有茶底如純茶、水果茶及綠茶都特意用萃茶機萃1分23秒而成，可以萃取茶內精華之餘茶味仲啱啱好！
另外芝士奶蓋都好出色，加入芝士奶酪塊、純牛奶、淡奶油及煉奶，再人手控制機器將奶蓋打至合適稠度，老闆話溫度同力度嘅控制都好重要～芝士奶蓋濃厚稠滑，鹹香味十足！
牛油果益力多
加入原隻牛油果配益力多，不加額外糖份，好飲之餘又營養豐富，啱晒咁多位女士同牛油果控啊！
芝士桃桃(左)、芝士草莓(右)
芝士奶蓋同水果一向都係最佳拍擋，呢杯芝士桃桃就啱晒打卡啦！加入80g鮮桃肉及火龍果汁取其顏色，底層仲有寒天，加埋粒粒桃肉又幾有口感～將新鮮草莓搗碎打成汁後加入濃厚芝士奶蓋，酸酸甜甜嘅草莓可以中和奶蓋膩感，飲落又幾清新。
更多【新店直擊】： |
芝士桃香烏龍
想試試純茶系列，可以試吓呢杯芝士桃香烏龍，飲落一份茶香一份奶香，啱晒平時唔係咁好甜嘅朋友。
芝士奧利奧抺茶
聽到個名都覺得邪惡啊！香濃嘅抺茶牛奶加上鹹香幼滑嘅芝士奶蓋，最後再灑上粒粒Oreo，飲完一定勁滿足。
爆芒百香果
想飲啲清新嘢可以試試呢杯爆芒百香果，每杯使用半隻新鮮芒果。將芒果果肉搗碎成芒果蓉，食完飯飲返杯就最合適啦～
地址: 銅鑼灣渣甸街30號地下A號舖
文、相、片: Yanica