憑招牌焗飯做咗19年嘅新森林焗之專門店，最近亦加入鍋物戰團，推出各位熱捧嘅一人鍋物系列。系列有5款鍋物，有清淡有鮮味有酸辣有麻辣有靚牛，睇下有咩食先！

率先介紹嘅當然係有原隻鴨髀嘅酸辣海鮮烤鴨脾雜菜湯鍋($68)，齋聽個名都知鍋物有幾豐富。

除咗海蝦、帆立貝、魷魚、餃子、菜苗、菇物、西蘭花、豆腐之外，仲有呢隻非常浮誇嘅原隻鴨髀。鴨髀用slow-cooked手法慢煮4個鐘頭，肉味好濃，又夠軟腍，好正！

海蝦亦見鮮甜彈牙，夠晒啖啖肉。而帆立貝雖然只有一粒，但勝在吸味夠鮮甜。

加埋呢個用豬骨、雞骨、酸辣醬熬成嘅湯底，令整個鍋物都好惹味。

而另一款用同樣湯底嘅安格斯肥牛帆立貝雜菜湯鍋($72)，就以安格斯肥牛做主角。肥牛係各位火鍋精嘅必點item，貪肥牛夠爽口又快熟。

呢鍋肥牛都有成4-5塊，而且油花分佈平均，都幾有嚼頭。

除咗豬骨湯底，仲有用鮮魚熬成湯底嘅3款鍋物，分別係鯛魚濃湯海鮮鍋($72)、蕃茄魚湯海鮮鍋($74)及四川麻辣魚湯海鮮鍋($74)。廚房用咗50斤𩶘魚及其他雜魚、再加入豆腐、白蘿蔔、京葱、洋葱、薑片、胡椒一同熬煮至少兩個鐘頭而成。

開飯仔最鍾意嘅就係鯛魚濃湯海鮮鍋，海鮮尤其豐富，有魚肚、魚唇、青口、帆立貝、魷魚及海蝦。

魚肚大塊兼厚身，而且好吸湯味，吸收魚湯嘅鮮美，食落好juicy。不過食嘅時候小心噴汁燙親個嘴呀。而魚唇口感軟腍之餘，仲好有骨膠原感，食完好黏嘴。

青口味道不算好吸湯，可能要煮耐少少先食會入味啲。

除咗配料，每個鍋物亦跟配泡飯或者稻庭烏冬，識食梗係揀彈牙又滑溜嘅稻庭烏冬啦！

至於飲品，鍋物跟1杯熱飲，凍飲加$3。加錢再轉特飲，有香芒之戀人、荔枝藍蝶粒粒梳打、巨峰提子藍蝶粒粒梳打、夏日冰涼青蘋果梳打及韓式柚子肉梳打。

新森林焗之專門店
地址：灣仔灣仔道203號地舖

文：Joy